Հայ-ուրուգվայական հարաբերությունների հետագա զարգացման ուղիները՝ Իշխան Սաղաթելյանի և Սիլվանա Բարոլինի հանդիպման օրակարգում

«Հայաստան» խմբակցության պատգամավոր Իշխան Սաղաթելյանը գրել է. «Այսօր, որպես Հայաստան–Արգենտինա և Հայաստան–Ուրուգվայ բարեկամական խմբերի ղեկավար, Ազգային ժողովում խմբի անդամների հետ հանդիպել եմ Հայաստանում Ուրուգվայի Արևելյան Հանրապետության արտակարգ և լիազոր դեսպան Սիլվանա Լեսկա Բարոլինին։

Հանդիպման ընթացքում ընդգծել եմ հայ–ուրուգվայական ավանդական բարեկամական հարաբերությունների բարձր մակարդակը և երկկողմ համագործակցության զարգացման կարևորությունը։ Հատուկ կարևորել եմ Ուրուգվայում գործող հայկական համայնքի դերը՝ որպես երկու ժողովուրդների միջև կամուրջ ծառայող կարևոր կառույց, որը նշանակալի ներդրում ունի բարեկամական կապերի ամրապնդման և պատմական հիշողության պահպանման գործում։

Քննարկել ենք հայ–ուրուգվայական հարաբերությունների հետագա զարգացման ուղիները, ինչպես նաև տարածաշրջանային և մարդասիրական հարցեր։

Մասնավորապես, անդրադարձել ենք Ադրբեջանում ապօրինի պահվող հայ ռազմագերիների և քաղաքացիական անձանց հարցին՝ ընդգծելով նրանց անհապաղ վերադարձի անհրաժեշտությունը և միջազգային իրավունքի նորմերի պահպանման կարևորությունը։

Անդրադարձել եմ նաև Հայաստանի ներքին և արտաքին մարտահրավերներին։ Կարևորել ենք միջխորհրդարանական բարեկամական խմբերի միջև ակտիվ համագործակցությունը՝ մեր երկրների հարաբերությունները նոր մակարդակի բարձրացնելու նպատակով»։