Կառավարության ծրագրին կողմ քվեարկելու դեպքում պետք է բացատրեին` ինչու են ընդդիմություն. Գագիկ Մինասյան

ՀՀԿ խմբակցության պատգամավոր, ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանն այսօր լրագրողներին ասաց, որ կառավարության ծրագրի ներկայացմանը նախորդել է լայնածավալ աշխատանք, ախտորոշվել է մեր տնտեսության և պետության գործունեության մնացած ոլորտներում առկա վիճակը:

Նրա խոսքով` վերհանվել են այն բոլոր խնդիրները, որոնք խոչընդոտում են երկրի առաջընթացին և զարգացմանը:

Պատգամավորը նաև նշեց, որ ծրագիրը չափազանց իրատեսական է: «Կառավարության 5 տարվա գործունեության ծրագիրը ժամկետայնության չափազանց  բարձր մակարդակ ունի, հստակ սահմանված է, թե որ տարվա ընթացքում ինչ պետք է արվի և ինչպիսի զարգացում պետք է ապահովվի: Սա կարևոր է, քանի որ մենք խորհրդարանական համակարգի ենք անցել, այսպես խորհրդարանը բարձրացնում է իր վերահսկողական գործառույթները, և ահա այսպիսի որակի փաստաթուղթը, որում բավականին հստակ ներկայացված են ծրագրերի իրականացման ժամկետները, լուրջ հնարավորություն է տալիս, որպեսզի խորհրդարանը կարողանա միշտ ձեռքը պահել զարկերակի վրա և հասկանալ` արդյո՞ք այն ծրագրերը, որոնք ներկայացված են, իրականացվում են, և արդյո՞ք հետ չեն ընկնում այն ժամանակացանկից, որը նախատեսված է  եղել ի սկզբանե»,- ասաց Մինասյանը:

Նրա խոսքով` ներկայացվել է ծրագիր, երբ արդեն  այս տարվա բյուջեի կատարման հետ կապված ունենք առաջին եռամսյակի ցուցանիշները և մոտենում ենք այն բանին, որ շուտով կունենանք այս կիսամյակի ցուցանիշները:

«Եթե մենք նախորդ տարվա ավարտին սահմանեցինք, որ մենք այս տարվա սկզբին պետք է ունենանք  համախառն ներքին արդյունքի 3.2 % աճ, ապա առաջին եռամսյակի արդյունքները բավականին գերազանցում են այդ ցուցանիշը, մենք ունենք  համախառն ներքին արդյունքի 6.5% աճ առաջին եռամսյակում: Տնտեսության աճի ցուցանիշը առաջին 5 ամիսների համար եղել է 6.4»,- ասաց նա, ապա հավելեց, որ  այս բարձր տնտեսական աճի պարագայում մենք ունենք հարկային եկամուտների հավաքագրման առաջանցիկ աճ:

Ըստ պատգամավորի` դա պայմանավորված է այն հանգամանքով, որ մեր հարկային և մաքսային ծառայությունները իրականացնում են լայնամասշտաբ աշխատանք` ֆինանսների տեղափոխում ստվերից դեպի տնտեսություն:

Հարցին` եթե ծրագիրն այդքան լավն է, ինչո՞ւ ընդդիմությունը դեմ քվեարկեց, Մինասյանը պատասխանեց, որ ծրագիրը 64 կողմ ձայնով հաստատվել է: «Ընդդիմությունը հենց դրա համար էլ ընդդիմություն է. եթե ընդդիմությունը կողմ քվեարկեր իշխանության ներկայացրած ծրագրին` 5 տարվա համար, ապա ստիպված պետք է բացատրեր, թե ինչու է ինքը ընդդիմություն»,- նշեց նա: