Վարչապետն անդրադարձավ Արթիկում տեղի ունեցած պատահարին

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանն անդրադարձավ Արթիկում գիշերը տեղի ունեցած արտակարգ պատահարին, երբ փլուզվել էր Արթիկի շենքերից մեկի արտաքին պատը։ Նա խնդրեց տարածքային կառավարման և զարգացման նախարար Դավիթ Լոքյանին` զեկուցել իրավիճակի մասին։

«Արթիկում բնակելի շենքում քարաթափություն է եղել, ստեղծվել է վթարային վիճակ` ներքևից վերև։ Բնակիչները գիշերը ժամը 2-ին տարհանվել են»,- ասաց Դավիթ Լոքյանը՝ հավելելով, որ պետք է արագ ուսումնասիրություն կատարվի ԱԻ նախարարության կողմից, որպեսզի արագ լուծում տրվի այն ընտանիքների կեցության հարցին, որոնք հայտնվել են դրսում։

ԱԻ նախարար Դավիթ Տոնոյանը հավելեց, որ 11 ընտանիք հետ է վերադարձել բնակելի շենք, սակայն դա իրենք սխալ են համարում, քանի որ շենքը վթարային է։

Վարչապետը հանձնարարեց նիստից հետո խորհրդակցություն անցկացնել` անհրաժեշտ լուծումները գտնելու համար։

Գիշերը, ըստ ԱԻՆ հաղորդագրության, ահազանգ է ստացվել, որ Շիրակի մարզի Արթիկ քաղաքի Սասունցի Դավթի փողոցի թիվ 13 շենքի արտաքին պատը փլուզվել է: Պարզվել է, որ թիվ 13 շենքի (կառուցված 1986 թ.) արևմտյան մասի ստորին հատվածում տեղի է ունեցել քարաթափում (մոտ 4 քմ), և արտաքին հատվածում առկա են մինչև 2 սմ հաստությամբ և մոտ 13 մ երկարությամբ ճաքեր։ Մինչ փրկարարների՝ կանչի վայր հասնելը շենքի վտանգավոր հատվածից տարհանվել է թվով 20 բնակիչ, ևս 11 բնակիչ (4 անչափահաս) մնացել է շենքի անվտանգ հատվածում: Տուժածներ չկան:

Փրկարարները սահմանազատել են վտանգավոր հատվածը, ապահովել տարածքի լուսավորությունը և չտարհանված բնակիչների հետ տարել բացատրական աշխատանքներ: