Առողջապահության նախարարն անդրադարձավ հնգյակի դեպքին

Այսօր «Ելք» խմբակցության պատգամավոր Մանե Թանդիլյանը 2016-ի բյուջեի կատարողականի քննարկման ժամանակ առողջապահության նախարար Լեւոն Ալթունյանից հետաքրքրվեց նորածինների մահացության դեպքերի մասին: Թանդիլյանը, մասնավորապես, հարցրեց, թե նախարարը կարո՞ղ է  նշել` որքա՞ն դեպք է եղել մեկ տարվա ընթացքում, և նորածնային մահացության ցուցանիշներն ինչպիսի՞ն են Հայաստանում:

Նախարարը պատասխանեց, որ թեման նուրբ է, զգայուն և ցավոտ: Նա հիշեցրեց հնգյակ երեխաների դեպքը: «Հղիության 2-րդ ամսում մորն առաջարկվել էր երեխաների մի մասին թողնել, սակայն մայրը հրաժարվել էր, և կատարվեց այն, ինչ կատարվեց: Արդյունքում` երեխաները ծնվեցին 3 ամիս շուտ և թերզարգացած»,- նշեց նախարարը:

Ինչ վերաբերում է մահացության ցուցանիշի նվազեցմանը, ապա դա, ըստ նրա, չափազանց թանկ հաճույք է: Սակայն Ալթունյանը հավաստիացրեց, որ նախարարությունը ձեռնարկում է բոլոր միջոցառումները և ձեռք բերում սարքեր մանկական մահացության ցուցանիշը նվազեցնելու համար: «2015-ին մեզ մոտ գրանցված ցուցանիշը գերազանցում էր Արևմտյան Եվրոպայի ցուցանիշը, սակայն այս տարի մեզ հաջողվեց նվազեցնել այն: Այս արդյունքն ունենալուն նպաստեց նաև ՀՀ գլխավոր մանկաբարձ-գինեկոլոգ Ռազմիկ Աբրահամյանի տարած աշխատանքը՝ բոլոր գինեկոլոգներին թեստավորելը»,- նշեց նախարարը: