Մեզ հարիր չէ անհանդուրժողականությունը. ԿԳ նախարարն անդրադարձավ տարազով սևամորթ տղայի հայտնի նկարին

Հունվարի սկզբին համացանցում էր հայտնվել ընտանեկան գեղեցիկ մի լուսանկար` սևամորթ տղայի, հայ աղջկա և նրանց փոքրիկի` հայկական տարազով: Սևամորթ տղայի` հայկական տարազով հանդես գալն ու հայի հետ ամուսնանալը շատերը կարծես չմարսեցին. սոցիալական ցանցում ուսուցչուհիներից մեկն էլ հանդես էր եկել խիստ քննադատությամբ:

Այսօր «Ազատություն» ռադիոկայանի ֆեյսբուքյան ասուլիսի ժամանակ ԿԳ նախարար Լևոն Մկրտչյանին օգտատերերից մեկը հարց էր ուղղել, թե ինչպե՞ս է նախարարը վերաբերվում խնդրին, որ ուսուցիչն անհանդուրժողականություն է քարոզում: Ի պատասխան նա նշեց, որ մեր երկրում սահմանադրորեն են պատժվում ռասիսզմը, խտրականությունը, և ինքը նույնպես դեմ է խտրականությանը:

«Ես պատմաբան եմ, և ինձ համար որակել մի ամբողջ ռասայի մի անունով, որը վիրավորական է նրանց համար, նույնն է, ինչ թուրքերը մեզ ասում են` գյավուր: Պետք է հարգենք դիմացինին, որ ինքներս էլ հարգվենք: Եթե այլատյացություն լինի մեզ մոտ, մյուսներն էլ մեզ կատեն: Ինչ վերաբերում է ուսուցչին, ապա ես խնդրում եմ քաղաքապետարանին` ճշտեն` կա՞ նման մարդ, և հետո նոր միջոցներ կձեռնարկենք: Մեր ժողովրդին հարիր չէ անհանդուրժողականությունը, մենք տոլերանտ ժողովուրդ ենք. մեզ մոտ գրեթե մուսուլման չկա, բայց մենք մզկիթ ունենք»,- ասաց ԿԳ նախարարը: