Վարչապետն անդրադարձավ սոցիալական ոլորտում կոռուպցիոն դրսեւորումներին

Այսօր կառավարության` այս տարվա վերջին նիստն է: Օրակարգին անցնելուց առաջ վարչապետ Կարեն Կարապետյանը կարևոր հանձնարարականներ տվեց սոցիալական ոլորտի վերաբերյալ: Հիշեցնենք, որ ԱԱԾ-ն կոռուպցիոն ռիսկերի կասկածանքով ձերբակալել է ԲՍՓ գործակալության պետին՝ Արմեն Սողոյանին: Կարեն Կարապետյանը շեշտեց, որ սոցիալական ոլորտում ակնկալում է խոշոր բարեփոխումներ. պետք է ստեղծել այնպիսի համակարգեր, որոնք կբացառեն ոլորտում կոռուպցիան, հարկավոր է բարձրացնել ծրագրերի հասցեականությունը, արդյունավետությունը:

«Հարկ է, որ պետությունը օգնոթյան ձեռք մեկնի կարիքավորին, նրան նեցուկ լինի, բայց չստեղծի չաշխատելու համար խթաններ: Պետք է օգնի անհատին` դուրս գալ դժվարին կացությունից, այլ ոչ այդ պայմաններին, այդ վիճակին սովորեցնի: Սոցիալական պետական ծրագրերը այնպես պետք է մշակել, որ դրանք չբերեն կոռուպցիոն դրսևորումների, առաջին հերթին օգնի կարիքավորներին և չաղավաղի սոցիալական արդարությունը»,- ասաց վարչապետը՝ առանձին-առանձին անդրադառնալով սոցիալական ոլորտի 6 ծրագրերին: