Սեյրան Օհանյանն անդրադարձավ Գյումրու 102-րդ ռուսական ռազմաբազայում տիրող իրավիճակին

Պաշտպանության նախարար Սեյրան Օհանյանն այսօր լրագրողների հետ զրույցում արձագանքեց այն դիտարկմանը, որ Գյումրիի 102-րդ ռազմաբազայի զինվորներն արդեն երկրորդ անգամ ահաբեկում են գյումրեցիներին, նաև հարցին` արդյո՞ք հայկական կողմը որևէ քայլ անում է կարգուկանոն հաստատելու ուղղությամբ:

«Մենք 102-րդ ռազմաբազայի հետ համագործակցում ենք: 102-րդ ռազմաբազան մտնում է միացյալ զորախմբի կազմի մեջ, և մեր համագործակցության շրջանակներում մենք անընդհատ աշխատանքներ տանում ենք ոչ միայն մեր օպերատիվ-մարտական պատրաստության պլանն իրագործելիս, այլ նաև մեր հարաբերությունների շրջանակներում, հատկապես` նաև տեղի բնակչության հետ կապի ամրապնդման ուղղությամբ: Եթե լինում են խախտումներ, այդ խախտումները պետք է իրենց պատասխանը ստանան: Հրամանատարական կազմում տեղի ունեցած փոփոխությունները նաև կատարվել են դրա համար, որ դեռևս գոյություն ունեցող այդ տիպի թերությունները վերացվեն»:

Հիշեցնենք, որ օրեր առաջ մի ռուս զինծառայող հարբած փորձել էր մտնել գյումրեցու բնակարան: