Պլատոնն իմ ընկերն է, բայց ճշմարտությունն ավելի թանկ է. Աշոտյանն անդրադարձավ Սեյրան Օհանյանի հայտարարությանը

Այսօր ՀՀԿ գրասենյակում ՀՀԿ փոխնախագահ Արմեն Աշոտյանի ամփոփիչ ասուլիսի ժամանակ անդրադարձ է եղել նախկին պաշտպանության նախարար Սեյրան Օհանյանի այսօրվա հայտարարությանը:

Նշենք, որ Սեյրան Օհանյանն այսօր տարածել էր հաղորդագրություն, որում հայտնում էր ակտիվ քաղաքականություն վերադառնալու` իր հավակնությունների մասին: Աշոտյանի խոսքով` մամուլը երկար եփեց Սեյրան Օհանյանի քաղաքականություն վերադառնալու գործընթացը, ուստի նրա այսօրվա հայտարարությունը անակնկալ չէր:

«Ցանկացած պարագայում ունենալով հարգանք գեներալի անցած քաղաքական ու մարտական ուղու նկատմամբ, ունենալով նաև մարդկային հարաբերությունների ջերմ ու գնահատելի պաշար Սեյրան Օհանյանի հետ, այնուամենայնիվ, տեղին է հիշել լատինական մի հայտնի ասածվածք. «Պլատոնն իմ ընկերն էր, բայց ճշմարտությունն ավելի թանկ է»,- ասաց նա:

Աշոտյանի խոսքով`  քաղաքական գործընթացներում այդ ճշմարտությունը որոնելու պրոցեսում ներգրավվելու սահմանադրական իրավունք ունեն բոլոր քաղաքացիները, այդ թվում` նախկին պաշտոնյաները:

«Հայաստանի քաղաքական  կյանքում միշտ փորձում են դիրքավորվել նախկին նախագահներ, վարչապետեր, նախարարներ: Քաղաքականությունը ձգում է նախկին իշխանավորներին: Փորձը  ցույց է տալիս, որ նրանք չեն կարողացել արձանագրել քաղաքականության մեջ շատ մեծ արդյունքներ, բայց ինչ-որ մի տեղ քաղաքական արևի տակ կարողանում են տեղ զբաղեցնել` ունենալով որոշակի քաղաքական ծրագիր, ամբիցիաներ»,- ասաց նա` հավելելով, որ քաղաքականություն մուտք գործելու փաստը դեռ քիչ բան է որոշում, որովհետև կան շատ այլ կարևոր նախադրյալներ:

Վերջում Աշոտյանը խորհուրդ տվեց ժամանակակից քաղաքականությանը նայել Չարլզ Դարվինի աչքերով: Ըստ նրա` քաղաքական տեսակները տարբեր են լինում` դինոզավրերից մինչև սողուններ, թռչուններից մինչև կաթնասուններ: