Հեպատիտ C-ով հիվանդ 1000 հոգու պետությունն անվճար դեղորայք կհատկացնի. գլխավոր վարակաբան

2015 թվականին լուրջ համաճարակ էր մեր երկրում, իսկ այս պահի դրությամբ այս կամ այն վարակիչ հիվանդության վտանգ կանխատեսելու նախադրյալ չունենք. այսօր լրագրողներին ասաց Հայաստանի գլխավոր վարակաբան Արա Ասոյանը: Նա տեղեկացրեց նաև, որ հունիսի 1-ից հեպատիտ C-ով հիվանդ 1000 հոգու պետությունն անվճար դեղորայք կհատկացնի:

«Հայաստանում բավականին լուրջ խնդիր է հեպատիտ C-ի բուժումը, դեղամիջոցները թանկ են` շուրջ մի քանի հազար դոլար են, չէր լինում պետպատվերով իրականացնել բուժում: Առողջապահության նախարությունը հազար հիվանդի համար կարողացել է դեղեր ներմուծել Հայաստան: Ամսի 1-ից արդեն կստանան»,- ասաց Ասոյանը՝ հավելելով, որ Հայաստանում հեպատիտ C-ով վարակված է 4-5 հազար մարդ:

Վարակաբանի խոսքով՝ դեղերի անվճար հատկացման համար հիվանդների ընտրությունը պայմանավորված է նրանց հիվանդության աստիճանով: «Եթե հիվանդների մոտ այնպիսի փոփոխություններ են գնացել, որ վերածվել է լյարդի ցիռոզի, ձգտում ենք բուժել այն հիվանդներին, ովքեր հնարավորություն ունեն բուժվելու»,- ասաց Ասոյանը: