Հայաստանի և Իրանի մաքսային մարմինները կփոխանակվեն էլեկտրոնային տվյալներով. ՊԵԿ

Մաքսային ոլորտում Հայաստան-Իրան համագործակցության սերտացմանն ուղղված քայլերը շարունակվում են. բարեփոխումների առանցքում այս անգամ մաքսային տեղեկատվության փոխանակում ապահովելու միջոցառումների իրականացումն է:

«Հստակ հանձնարարական է տրվել էականորեն ակտիվացնել Հայաստան-Իրան համագործակցությունը՝ նպաստելով ինչպես ուղևորների, այնպես էլ բեռների փոխադրման ծավալների աճին»,-նշել է Պետական եկամուտների կոմիտեի միջազգային համագործակցության վարչության պետ Սուրեն Մելիք-Իսրայելյանը:

Ապրիլ ամսին Իրանում, ՊԵԿ նախագահ Վարդան Հարությունյանի և Իրանի Իսլամական Հանրապետության մաքսային ծառայության ղեկավար Մասուդ Քարբասիանիի հանդիպմանը նոր ընթացք է տրվել տվյալների փոխանակման գործընթացի կազմակերպման աշխատանքներին: 

Պայմանավորվածության համաձայն՝ կարճ ժամանակում համաձայնեցվել և մայիսի 18-ին ՊԵԿ-ում նախաստորագրվել է  «ՀՀ ԿԱ պետական եկամուտների կոմիտեի և ԻԻՀ մաքսային ծառայության միջև ուղևորների, տրանսպորտային միջոցների և ապրանքների միջազգային տեղափոխման վերաբերյալ էլեկտրոնային տվյալների փոխանակման մասին» արձանագրությունը:

«Արձանագրության հիմնական նպատակը երկու երկրների գործարարների համար ապրանքների տեղափոխման գործընթացը դյուրացնելն է՝ այդպիսով նպաստելով Իրանի և Հայաստանի միջև տնտեսական փոխգործակցության ակտիվացմանը»,-ընդգծել է ԻԻՀ մաքսային ծառայության տեղեկատվական տեխնոլոգիաների վարչության ղեկավարի տեղակալ Ալի Ռամեզանին:

Մաքսային մարմինների միջև տվյալների փոխանակումը միտված է ամրապնդելու Հայաստան-Իրան  առևտրային հարաբերությունները, արագացնելու ուղևորների, տրանսպորտային միջոցների և ապրանքների սահմանահատման ու մաքսային ձևակերպումների գործընթացը: 

ՊԵԿ տեղեկատվական տեխնոլոգիաների վարչության պետ Միքայել Փաշայանի խոսքով՝ փոխանակվող տվյալները կծառայեն նաև ռիսկերի կառավարման ժամանակակից գործիքների կիրառմանը: Օրերս կոմիտեում սկիզբ է դրվել նաև «Մեղրիի սահմանային անցակետի արդիականացման» ծրագրին: Երկրի հարավային դարպասների արդիականացումը նոր ազդակ կհաղորդի Հայաստան-Իրան առևտրաշրջանառության աշխուժացմանը: Ունենալով միջազգային չափանիշերին համապատասխանող սահմանային անցակետ՝ բարենպաստ պայմաններ կստեղծվեն բիզնեսի և ապրանքաշրջանառության համար, այդ թվում՝ ապահովելով մարդկանց դյուրին տեղաշարժը սահմանին:

ՀՀ ԿԱ ՊԵԿ տեղեկատվության

և հասարակայնության հետ կապերի բաժին