Զախարովան անտեղի է անվանել Հաջիևի հայտարարությունը

 Ռուսաստանի ԱԳՆ պաշտոնական ներկայացուցիչ Մարիա Զախարովան անտեղի է համարել Ադրբեջանի ԱԳն ղեկավար Հիքմեթ Հաջիևի հայտարարությունը «Համառուսական ադրբեջանական կոնգրես» ՀԿ-ի լուժարման կապակցությամբ:

«Ուշադրություն ենք դարձրել ռուսաստանյան ներքին քաղաքականության վերաբերյալ Ադրբեջանի ԱԳՆ-ի ներկայացուցչի ելույթին. հնչում էին արտահայտություններ մեր երկրում «ազգամիջյան հարաբերությունների հավասարակշռության, բարեփոխումների հայեցակարգի ու միջմշակութային երկխոսության հեռանկարների» մասին։ Նման հայտարարություններն անտեղի ենք համարում»,-ասել է նա:

Զախարովայի խոսքով` ցավալի է, որ Ադրբեջանի արտաքին քաղաքական գերատեսչությունը կիրառում ու հրապարակավ հնչեցնում է մի շարք լրատվամիջոցներում հրապարակված վարկածները ինչ-որ «հայկական հետքի» մասին։

«Մենք ոչ մի կասկածելի խորհուրդների կարիք չունենք, թե ինչպես մեր երկրում կառուցենք ազգամիջյան հարաբերություններ»,-ասել է նա:

Նշենք, որ ՌԴ Գերագույն դատարանը արդարադատության նախարարության պահանջով լուծարել է «Համառուսական ադրբեջանական կոնգրես» ՀԿ-ն: Կազմակերպությունը խախտումներ է թույլ տվել, որոնք այնդպես էլ չեն վերացվել:

Հաջիևը նշել է, որ նման որոշումը ափսոսանք և զարմանք է առաջացնում: «Կազմակերպության լուծարումը և Ռուսաստանի հայերի միությանը տրամադրվող աջակցությունը կարող է ընկալվել որպես հավասարակշռության խախտում ՌԴ հայ և ադրբեջանցի քաղաքացիների նկատմամբ»,- ասել է նա: