Էրդողան-Պուտին բանակցությունների արդյունքները

Սոչիում երեկ կայացել է ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպումը, որը տևել է ավելի քան 3 ժամ. հայտնում է РИА Новости-ն: Հաղորդվում է, որ քննարկումների առանցքային թեման եղել են երկկողմ հարաբերությունների հարցերը:

Պուտինի խոսքով` ՌԴ-ն և Թուրքիան հակված են ամրապնդել բազմակողմ համագործակցությունը:

Հատուկ ուշադրություն է դարձվել տնտեսական ոլորտում փոխգործակցությանը, առևտրային և ներդրումային փոխանակումներին խանգարող արգելքների և սահմանափակումների վերացմանը:

Էրդողանը Պուտինին հրավիրել է Սևծովյան տնտեսական համագործակցության կազմակերպության գագաթաժողովին, որը տեղի կունենա մայիսի 3-ին Թուրքիայում: Էրդողանի խոսքով` ռուսական և թուրքական կողմը մեծ կամք են դրսևորում երկրների միջև հարաբերությունները ամրապնդելու համար:

Խոսելով ահաբեկչության մասին` Էրդողանը նշել է, որ Թուրքիան իր ռուս գործընկերների կողքին է ահաբեկչության դեմ պայքարում, և որ ահաբեկչությունը սահմաններ չի ճանաչում:

Քննարկվել է նաև Սիրիայում իրավիճակը: Երկու առաջնորդները միակարծիք են այն բանում, որ սիրիական Խան Շեյխունեում քիմիական հարձակման մեջ մեղավորները պետք է պատժվեն: Էրդողանը հայտարարել է, որ Անկարան թույլ չի տա, որ իր հետ սահմանին խմբավորումներ հայտնվեն, որոնք կսպառնան երկրի անվտանգությանը, և քայլեր կձեռնարկի իր քաղաքացիներին պաշտպանելու համար: