Հեռու եմ մտքից, որ Տարոն Մարգարյանի ղեկավարման ընթացքում Երևանում ամեն բան կարգավորվել է. Աստղիկ Գևորգյան

Ժուռնալիստների միության նախագահ, Երևանի գործող ավագանու անդամ Աստղիկ Գևորգյանը, ով Հանրապետական կուսակցության ցուցակով այս անգամ էլ  չորրորդ համարն է և կրկին ցանկանում է դառնալ ավագանու անդամ,  Yerkir.am-ի հետ զրույցում հայտարարեց, որ երևանցին ընտրություն կատարելիս պետք է նախ գիտակցի, որ ավագանու ընտրությունները տարբերվում են խորհրդարանական ընտրություններից, քանի որ բացակայում են քաղաքական տարրերը ու ավելի շատ ներառում են տնտեսական, կենցաղային, հասարակ քաղաքացուն հուզող հարցեր:

Խոսելով գործող քաղաքապետ և Երևանի ավագանու թեկնածու Տարոն Մարգարյանի պաշտոնավարման ընթացքում կատարած աշխատանքների մասին՝  նա ընդգծեց, որ մեկ զրույցի ընթացքում դժվար թե հնարավոր լինի դրանք ամբողջությամբ թվարկել: «Կարևորներին կուզեի անդրադառնալ: Նախ` պետք չէ ասել միայն` Տարոն Մարգարյան, որովհետև Տարոն Մարգարյանի առաջին արժանիքն այն է, որ թիմով է աշխատում և սիրում է ունկնդրել, խորհրդակցել, հաշվի առնել առաջարկությունները: Հատկապես ավագանու հետ լուրջ քննարկումներ են լինում, հենց երևանցիների հետ է քննարկումներ անում, որից ես զարմացած եմ մնացել: Անցյալ ընտրություններին գնում էինք քարոզարշավի, Մարգարյանը հանգիստ գիտեր՝ որտեղ ինչ խնդիր կա»,- ասաց Գևորգյանը՝ հավելելով. «Տարոն Մարգարյանի և նրա թիմի շրջայցերն անչափ շատ են,  ինչը նպաստում է Երևանի զարգացմանը: Տարոն Մարգարյանը շատ է սիրում Երևանը, նա զուտ ղեկավար չէ, նա Երևանը սիրող մարդ է, այն նախանձախնդիր վերաբերմունքը, որը նա ունի կանաչ տարածների նկատմամբ, աննկարագրելի է: Օրինակ՝ Դավթաշենում վերջերս գրանցված ծառահատման դեպքն անձնական բան էր նա համարում, շատ զայրացած էր: Հասկանո՞ւմ եք, մենք միանման ենք հարցերին մոտենում, խնդիր չի լինում Տարոն Մարգարյանի հետ աշխատելու ժամանակ, պատնեշ չկա, մենք շատ հեշտ ենք աշխատում»:

Գևորգյանի խոսքով՝ Տարոն Մարգարյանին կրկին ընտրելու պատճառներից մեկն էլ այն է, որ երևանցին օր օրի զգում է, թե Երևանն ինչպես է զարգանում: «Մաքրությունը, կանաչ տարածքները, հրաշալի խաղահրապարակները` երեխաները խաղում են խաղահրապարակում, բարեկարգված է բակերի մեծ մասը: 160 մանկապարտեզի սնունդը վերահսկողության տակ է, ջեռուցվում են բոլոր մանկապարտեզները, գույքավորված են բոլոր մանկապարտեզները: Մենք անցել ենք ծանր տարիներ, երբ երեխաները մուշտակով ու վերարկուով են քնել, հիմա մենք այդ ամենը մոռացել ենք, արդեն լավ վիճակում ենք ու այդ ամեն ինչը մոռացե՞լ ենք»,- ասաց նա, սակայն, միևնույն ժամանակ, շեշտեց, որ հեռու է այն մտքից, որ Տարոն Մարգարյանի կամ էլ ուրիշ մեկի ղեկավարման ընթացքում Երևանում ամեն բան կարգավորվել է:

Գևորգյանն անմիջապես համաձայնեց մեր դիտարկմանը, թե Երևանում տրանսպորտի հարցը ծայրաստիճան խնդրահարույց է: «Տրանսպորտն իսկապես լուրջ խնդիր է: Հաջորդ խնդիրն է փողոցային երթևեկության կարգուկանոնի սահմանումը,  որն այդպես էլ չի կանոնակարգվում, ինչքան էլ դա ՃՈ խնդիրն է, ոչ  թե քաղաքապետարանի: Բառի մաթևոսյանական առումով` Տարոն Մարգարյանը տերն է Երևանի, բայց եթե անգամ ՃՈ խնդիրն է,  քաղաքապետն էլ պետք է նախանձախնդիր լինի, որ Երևանում ամեն ինչ լավ լինի»,- ասաց նա՝ ընդգծելով, որ տրանսպորտի խնդրի կարգավորումը կախված է լուրջ ներդրումների հետ:

«Արտերկրից տրանսպորտային միջոցներ ներկրվեցին, բայց մրցույթին շատ քիչ մասնակիցներ են եղել. երևի թե ցածր է վարձատրությունը, բայց հիմա` ապագա ծրագրում, եթե մենք հաղթենք, դուք ականատես կլինեք, թե ինչքան կարճ ժամանակում միջազգային համապատասխան  կազմակերպությունները  մեծ գործ կանեն»,- նշեց Գևորգյանը: