Հաստատվեց զինված հարձակման ժամանակ տագնապ հայտարարելու կարգը

Այսօր կառավարության նիստում ԱԻ նախարար Դավիթ Տոնոյանը ներկայացրեց արտակարգ դրության կամ զինված հարձակման ժամանակ տագնապ հայտարարելու կարգը: Ըստ նրա՝ արտակարգ ռեժիմի համար կօգտագործվեն կապի բոլոր ուղիները՝ հեռուստատեսություն, ռադիո, համացանց և հեռախոսային հաղորդակցություն, ինչպես նաև ստացիոնար և շարժական վերարտադրիչներ: Տագնապի ազդանշանի տեսակներն են՝ «Օդային ազդանշան» (օդային հարձակման և դրա վտանգի դեպքում) և «Ուշադրություն բոլորին» (արտակարգ իրավիճակի կամ զինված հարձակման և դրա սպառնալիքի դեպքում): Տեղական ինքնակառավարման մարմինները պետք է բնակչության տարհանում իրականացնեն: Հանրապետական ծավալի արտակարգ դրության դեպքում տագնապ հայտարարելու մասին որոշումն ընդունում է վարչապետը, Հայաստանի վրա զինված հարձակման կամ դրա անմիջական վտանգի դեպքում, ՊՆ-ի տվյալների հիման վրա, լիազորված մարմնի օպերատիվ ծառայությունը: