Մոսկվան պատրաստ է ԼՂ հակամարտության կարգավորման երաշխավորը դառնալ. Լավրով

Մոսկվան պատրաստ է մյուս համանախագահների հետ ԼՂ հակամարտության կարգավորման երաշխավորը դառնալ, եթե Բաքուն և Երևանը համաձայնության գան: Այդ մասին ասվում է ՌԴ ԱԳՆ ղեկավար Սերգեյ Լավրովի` «Բաքվի աշխատավոր» թերթում հրապարակված հոդվածում, որը նվիրված է Ռուսաստանի և Ադրբեջանի միջև դիվանագիտական հարաբերությունների հաստատման 25-ամյակին: 

«Ռուսաստանը պատրաստ է աջակցել խնդրի լուծման տարբերակին, որը կգոհացնի բոլոր ներգրավված կողմերին»,- նշել է նա:

Լավրովը նշել է, որ միջնորդների աջակցության շնորհիվ կողմերին հաջողվել է էականորեն մոտեցնել դիրքորոշումները շատ վիճելի հարցերում:

«Հիմնականում համաձայնեցված են կարգավորման հիմնարար սկզբունքները: Սակայն Ադրբեջանը և Հայաստանը տարբեր կերպ են տեսնում դրանք կյանքի կոչելու հաջորդականությունը»,- նշել է նա` կոչ անելով Երևանին և Բաքվին` քաղաքական կամք և փոխադարձ զիջումների գնալու պատրաստակամություն դրսևորել: