Ոչ մի ԵՄ, ՌԴ, ԱՄՆ մեր անվտանգության երաշխավորը չէ, մեր երաշխավորը բանակն ու տնտեսությունն է. Մարուքյան

ԱԺ-ում ՀՀ-ԵՄ համապարփակ և ընդլայնված գործընկերության համաձայնագիրը վավերացնելու հարցի քննարկման ժամանակ «Ելք» խմբակցության անունից ելույթ ունեցավ պատգամավոր Էդմոն Մարուքյանը:

«Հինգ տարի առաջ մեր կողմից հնչեցված քննադատությունները ուժի մեջ են, որ Հայաստանը չի տանում երկու ինտեգրացիոն գործընթաց: Ինտեգրացիոն գործընթաց տարվել է միայն ԵԱՏՄ-ի հետ: Հայաստանը պետք է թարմացներ ԵՄ-ի հետ իր հնացած պայմանագիրը, որը թարմացվել է, և մենք աջակցել ենք, որ համաձայնագիրը ստորագրվի»,- հայտարարեց նա:

Մարուքյանի խոսքով` Հայաստանը, այո, ունեցել է ավելին ստանալու շանս, բայց դրանից զրկվել է: «Մենք ԵԱՏՄ ենք ստացել: Հուսով եմ` կառավարությունը լսում է` ՌԴ քաղաքներում հայ վարորդներին ոստիկանները կրկին նեղն են գցում, որ` վարորդական իրավունք հանեք: Զբաղվեցին, իբրև թե լուծվել էր, բայց չի լուծվել: Հորդորում եմ զբաղվել»,- ասաց նա:

Պատգամավորն ընդգծեց, որ ՀՀ իշխանությունները երկու բան են աշխարհին ասում: «Ասում են, որ անցել ենք խորհրդարանական կառավարման, ինչը պարզվեց սուտ է, և երկրորդ` մենք ստորագրել ենք համաձայնագիրը, վաղն էլ վավերացնելու ենք»,- նշեց նա և հավելեց, որ իրենց խնդիրն է լինելու պահանջել իշխանություններից` անցնել իրական, ոչ իմիտացիոն խորհրդարանական կառավարման և ամեն բան անել, որ այս համաձայնագիրը կյանքի կոչվի:

«Խաղը սկսվում է համաձայնագրի վավերացումից հետո, թե արդյո՞ք ՀՀ-ն կստեղծի հակակոռուպցիոն մարմին՝ վստահելի մարդկանցով, ովքեր կպայքարեն, ՀՀ-ն կունենա՞ անկախ դատական համակարգ, տնտեսական մրցակցության հանձնաժողով, որ չլինի այնպիսին, ոնց այսօր է, Հաշվեքննիչ պալատ, որն ունի այսօր, Ընտրական հանձնաժողով, որին ոչ ոք չի վստահում»,-հայտարարեց Մարուքյանը:

Նրա խոսքով` պայքարելու են, որ Սահմանադրությամբ նախատեսված` լիազորությունները փոխզսպող և հակակշռող ինստիտուտները լինեն:

Էդմոն Մարուքյանը, անդրադառնալով անվտանգության հետ կապված հարցադրումներին, նշեց, որ իրենք ասել են, որ ՀՀ-ի անվտանգությունը կարող է ապահովել միայն ՀՀ-ն՝ իր տնային աշխատանքով: «Իր տնային աշխատանքն անելով` կարող է ունենալ հզոր տնտեսություն, որի վրա հենված է հզոր բանակը: Ոչ մի ԵՄ, ՌԴ, ոչ մի ԱՄՆ մեր անվտանգության երաշխավորը չէ, մեր երաշխավորը բանակն ու տնտեսությունն է»,- ասաց նա:

Ըստ պատգամավորի` մինչ օրս իմիտացիաներ են և հիմա էլ շարունակվում են: «Մենք ամեն ինչ անելու ենք, մոնիտորինգի ենք ենթարկելու այս համաձայնագիրը, հետևողական ենք լինելու, որ ամեն դրույթ կյանքի կոչվի»,- եզրափակեց նա: