Ջավադյանենց հետ աշխատում ե՞ք. Վարչապետը` պետգույքի կառավարման վարչությանը

Այսօր  կառավարության նիստում  վարչապետ Կարեն Կարապետյանը Պետական գույքի կառավարման վարչության պետի տեղակալ Աշոտ Մարկոսյանին հիշեցրեց այն պայմանավորվածության մասին, որ որոշ ժամանակ անց պետական գույքի կառավարման վարչությունը պետք է ներկայացներ գնահատական, թե  այս տարվա օտարումից ինչ գումար կարող ենք ակնկալել:

«Այդ տեղեկանքը պատրա՞ստ է: Ես հիշում եմ, թե ձեզ ինչ թիվ եմ ասել,  բայց չեմ ուզում այստեղ ասել, կարող է այդ թվի տակից դուրս չգաք»,-ասաց նա: Աշոտ Մարկոսյանը նշեց,  որ տեղեկանքն  ամբողջությամբ պատրաստ է` ներառյալ  մասնավորեցման, օրենսդրական դաշտի փոփոխությունների այն հնարավորությունները, որոնք կարող են ավելացնել պետական բյուջեի եկամուտները:

Վարչապետը հետաքրքրվեց,  թե արդյո՞ք գործակցում են Կենտրոնական բանկի «Ջավադյանենց հետ»: Աշոտ Մարկոսյանը պատասխանեց, որ կարելի է ասել, որ Կենտրոնական բանկի հետ աշխատելով ճանապարհի կեսն  անցել են:

Կարեն Կարապետյանն արձագանքեց.«Չեմ հասկանում, ինչ է նշանակում` ճանապարհի կեսը, որովհետ ես ինֆորմացիա ունեմ,  որ Կենտրոնական բանկի նախաձեռնությունները բավականին երկար են  քննարկվում և ինֆորմացիա չի տրամադրվում: Մյուս հինգշաբթի օրը խնդրոմ եմ ձևակերպեք կոնկրետ հանձնարարական, թե ինչ պետք է անենք, որ այդ երեք կամ յոթ կառույցը տեղից շարժվեն: Մենք դրա մասնին բավականին երկար խոսում ենք, բայց ճանապարհ կեսը անցել ենք… այդ թվերը ինձ բան չեն ասում»: