Հայաստանում անցկացվող ընտրությունների ֆոնին Արցախն աչքաթող չի արվելու. Աշոտյան

Խորհրդարանական ընտրություններում հաղթելու պարագայում ՀՀԿ-ն շարունակելու է   վարչապետի իր թեկնածու համարել Կարեն Կարապետյանին: Այս մասին այսօր լրագրողներին ասաց ՀՀԿ փոխնախագահ Արմեն Աշոտյանը:

«Կարեն Կարապետյանը չունի իմ կամ էլ  ուրիշ մեկի հաճոյանալու կարիքը: Այնպես չէ, որ միայն ապավինում ենք վարչապետի կամ նախագահի կերպարներին: ՀՀԿ-ն ընտրություններին գնում է կուռ քաղաքական թիմով, թիմը պատրաստ է այս կարևորագույն քաղաքական իրադարձությանը»,- ասաց նա:

Աշոտյանը նաև նշեց, որ վերջին շրջանում սոցցանցերում  բավականին ակտիվացել են կեղծ էջերը: «Մենք նման քայլերի չենք դիմի, բայց բաց պատասխան ենք տալու նրանց, ովքեր քաղաքական պայքարը վերածում են ստի»,- ասաց նա:

Բանախոսն անդրադարձավ նաև սահմանային վերջին լարվածությունը և ասաց, որ որևէ պարագայում Արցախը չի կարող անտեսվել: «ՀՀ-ում անցկացվող ընտրությունների ֆոնին Արցախն աչքաթող չի արվելու, Ադրբեջանը թող նման հույսեր չունենա»,- ասաց Աշոտյանը: