Ոգևորիչ է արտահանման ու արդյունաբերության ցուցանիշների աճը. նախարար

Հունվար ամսվա տնտեսական աճի ցուցանիշները շատ ոգևորիչ են, որովհետև արձանագրվել է  արտահանման ցուցանիշի 35 տոկոս աճ` նախորդ հունվարի համեմատ. կառավարության նիստից հետո լրագրողներին ասաց ՀՀ տնտեսական զարգացման և ներդրումների նախարար Սուրեն Կարայանը: Ըստ նախարարի` ոգևորիչ է նաև, որ կա արդյունաբերության 12 տոկոս աճ:

«Այսինքն` այն ուղղությունները, որի մասին ասում էինք, և այն նախադրյալները, որի ուղղությամբ աշխատում էինք, արդեն թվային արտահայտություն են ստացել»,- ասաց նախարարը` հավելելով, որ տարվա կտրվածքով կանխատեսում են արտահանման 30 տոկոս աճ և արդյունաբերության 6-7 տոկոս աճ:

Իսկ ինչ վերաբերում է ընդհանուր տնտեսական աճի ցուցանիշներին, նախարարի խոսքով, բյուջեի հիմքում դրված 3,2 տոկոս տնտեսական աճը կառավարությունը կապահովի, սակայն կան նաև օբյեկտիվ գործոններ, որոնք կարող են ազդել այդ ցուցանիշի վրա:

Սուրեն Կարայանի խոսքով` արդեն գործողության մեջ են դրվել 8 ներդրումային ծրագրեր, որոնք նպաստելու են ներդրումային դաշտի աշխուժացմանը: