Զինվորից ծխախոտ չեն խլում. Վիգեն Սարգսյանը ներկայացրեց օրենքի նախագիծը

Այսօր կառավարության նիստում ՀՀ պաշտպանության նախարար Վիգեն Սարգսյանը ներկայացրեց որոշման փոփոխության վերաբերյալ նախագիծ, որը վերաբերում էր զինծառայողների ծխախոտը պարենային բավարարման ցանկից հանելուն: Նախարարը շեշտեց, որ այդ հարցը երեկ բավական մեծ իրարանցում էր առաջացրել հասարակության շրջանում, և ինքը ցանկանում է պարզաբանել:

«Խոսքը վերաբերում է տվյալ դեպքում պայմանագրային զինծառայողներին, որովհետև ժամկետային զինծառայողների ծխախոտի խնդիրը փոխհատուցվել է գումարով դեռ տարիներ առաջ, և ժամկետային զինծառայողները, այսպես, թե այնպես, ծխախոտ չեն ստացել: Իսկ պայմանագրային զինծառայողների համար հաշվարկվել է օրական մեկ տուփ ծխախոտ` մարտական դիրքերում գտնվելու ընթացքում, որը, մեր գնահատմամբ, չի տեղավորվում մեր քաղաքականության տրամաբանության մեջ: Դրա համար մենք առաջարկեցինք, որ նույն գումարը, որը ծախսվում է ծխախոտի վրա, ավելացվի հավելավճարներին, որպեսզի նրանք, ովքեր չեն ծխում, չխրախուսվեն ծխելու, իսկ նրանք ովքեր ծխում են, կարողանան ընտրել իրենց նախընտրած ծխախոտը կամ այդ գումարն օգտագործեն իրենց հայեցողությամբ: Որևէ այլ բան այս որոշմամբ չի արվում: Երեկ հետաքրքիր էր հետևել քննարկումներին, որոնցում դա մեկնաբանվում էր որպես զինվորից ծխախոտը խլելու որոշում: Իհարկե, նման բան գոյություն չունի»,- ասաց Վիգեն Սարգսյանը:

Կարեն Կարապետյանն արձագանքեց. «Դրա համա՞ր էիք այդքան մանրամասն մեզ պատմում»:

«Այո, որովհետև երեկ այդ հարցը շատ բուռն քննարկվեց»,- ասաց Վիգեն Սարգսյանը:

Նշենք, որ երեկ աղմուկ էր բարձրացել, քանի որ օրենքի նախագծում նշված չէ, որ ծխախոտի փոխարեն գումար է տրամադրվելու զինծառայողներին: