«Հայկական վերածնունդ» կուսակցությունում անձի պաշտամունք է. Արթուր Բաղդասարյանի նախկին կուսակիցը չի պատրաստվում հաշտվել

Հայտնել էինք, որ «Հայկանդուխտ» կուսակցության նախագահ Արմենուհի Ղազարյանը դիմել է դատարան` «Հայկական վերածնունդ» կուսակցության գրանցումը չեղյալ համարելու համար:

Արմենուհի Ղազարյանն այսօր լրագրողների հետ զրույցում նշեց, որ սկզբում դիմել է Կենտրոնի և Նորք-Մարաշի առաջին ատյանի դատարան, սակայն այնտեղից հետ են ուղարկել հայցը` նշելով, որ իրենց ընդդատյա չէ, այլ վարչական դատարանին: Սակայն վարչական դատարանից էլ է եկել պատասխան, որ այդ գործն իրենց ընդդատյա չէ, որ դիմեն առաջին ատյանի դատարան:

Ղազարյանը նշեց, որ չգիտի` էլ ում դիմի, և թողնում է ժողովրդի դատին: «Դատարանները միմյանց վրա են գցում գործը, քանի որ ինչ-որ մեկի ձեռքերը երկար են, և ստացվում է այսպես»,- ասաց նա:

Իսկ ՀՎԿ ներկայացուցիչները նորմալ համարեցին դատարանի այս վերաբերմունքը, քանի որ, ըստ նրանց,  գործը վարույթ ընդունելու որևէ հիմք չկա:

Yerkir.am-ի հարցին` կողմերը չե՞ն պատրաստվում հաշտության եզրեր գտնել, ՀՎԿ լրատվական-քարոզչական մասի ղեկավար Էդգար Առաքելյանը պատասխանեց, որ իրենք միշտ էլ համագործակցության եզրեր գտնում են այն մարդկանց հետ, ովքեր կիսում են իրենց գաղափարները, մանավանդ` ունեն անցած ճանապարհ:

Իսկ ահա Ղազարյանն արձագանքեց. « Ինձառաջարկ չի եղել, բայց ես չեմ հաշտվի: Երբեք: ՀՎԿ-ում անձի պաշտամունք է»: