Ինձ պետք է դատեն Էրդողանի ու Դավութօղլուի հետ. քրդամետ կուսակցության համանախագահ

Թուրքիայում ձերբակալված քրդամետ Ժողովուրդների դեմոկրատական կուսակցության համանախագահ Ֆիգեն Յուքսեքդաղն իր ելույթներից մեկի պատճառով հարուցված դատական գործի շրջանակներում կանգնել է դատարանի առաջ:

Նշենք, որ նրա դեմ մեղադրանք է առաջադրվել «ահաբեկչական խմբավորման, այդ թվում՝ Թուրքիայում ահաբեկչական համարվող PYD-ի քարոզչություն իրականացնելու» համար:

Ըստ Demokarthaber-ի՝ Յուքսեքդաղը հիշեցրել է, որ Թուրքիայի կառավարությունը նախկինում հյուրընկալել է այդ «ահաբեկչական»` PYD խմբավորման նախագահ Սալիհ Մուսլիմին՝ նշելով, որ եթե իրեն դատում են PYD-ի մասին ելույթի պատճառով, ապա նույն կերպ պետք է դատեն այդ ժամանակվա վարչապետ Դավութօղլուին և Էրդողանին:

«Ես հավատում եմ իմ ասածներին  և իմ խոսքերի տերն եմ: Մեզ թող ասեն՝ YPG-ն և PYD-ն ո՞ր թվականից ի վեր է ճանաչվել ահաբեկչական կառույց»,- ասել է նա՝ դատարանից արդարացում պահանջելով:

Մերժելով Յուքսեքդաղի պահանջը՝ դատարանը նիստը հետաձգել է մինչև մարտի 16-ը: