Իրանը չի պատրաստվում կատարել սիրիական ընդդիմության պահանջը

Իրանը չի քննարկի Սիրիայի ընդդիմության` իրանական աշխարհազորայինների ստորաբաժանումը Սիրիայից դուրս բերելու պահանջը. РИА Новости-ի հետ հարցազրույցում հայտարարել է Իրանի փոխարտգործնախարար Հոսեյն Ջաբերի Անսարին:

Երեկ Աստանայում անցկացված բանակցությունների արդյունքները ամփոփելիս Սիրիայի զինված ընդդիմության պատվիրակության ղեկավար Մոհամադ Ալուշը հայտարարել էր, որ ընդդիմությունը Իրանի համար ոչ մի դեր չի տեսնում Սիրիայում: Իսկ պատվիրակության ներկայացուցիչ Ուսամա Աբու Զեյդը պահանջել էր երկրից դուրս բերել բոլոր օտարերկրյա զորամիավորումները, այդ թվում ` իրանական:

«Մենք չենք քննարկի այդ հայտարարությունները և չենք պատասխանի դրանց, քանի որ դրանք իրենց, սիրիացի ժողովրդին և ամբողջ մերձավորարևելյան տարածաշրջանը դժբախտության ու ցավի մեջ գցած կողմերի թույլ ու ստոր հայտարարություններ են: Նրանք հիմնախնդրին մոտենում են ոչ օբյեկտիվորեն, խնդրի լուծման ճանապարհները մեկնաբանում են մեկուսացված ու անիրական: Սիրիայում հիմնախնդիրները ծնվեցին զինված խմբավորումների մտածողության պատճառով. իրադարձությունների սկզբում կարծում էին, թե իշխող վարչակազմի տապալմամբ շուտով կհասնեն արագ արդյունքների, սակայն իրենց իսկ գցեցին տհաճ վիճակի մեջ»,- ասել է Անսարին` հավելելով, որ Իրանն այդ հարցում իր գործընկերներ Ռուսաստանի և Թուրքիայի հետ փորձում է վերջ տալ դժբախտություններին ու նոր փուլ սկսել Սիրիայի համար: