Դոնալդ Թրամփին երդմնակալության արարողության ժամանակ վրացական չոխա կնվիրեն

ԱՄՆ նորընտիր նախագահ Դոնալդ Թրամփին նրա երդմնակալության օրը՝ հունվարի 20-ին, վրացական ազգային հագուստ՝ չոխա կնվիրեն, հայտնում է Грузия Online-ը:

Թրամփի համար նախատեսված նվերը պատրաստել է Վրաստանի մշակույթի պալատը: Պալատի նախագահ Դավիդ Օկիտաշվիլին հայտարարել է, որ այդ նվերը Վրաստանի և ԱՄՆ-ի միջև բարեկամության խորհրդանիշ է:

«Վրաստանի մշակույթի պալատն այդ օրվա կապակցությամբ, «Հագուստի տան» հետ միասին, չոխա է ստեղծել, որը երդմնակալությունից հետո կփոխանցեն ԱՄՆ նորընտիր նախագահին՝ ի նշան հարգանքի և բարեկամության»,- ասված է Facebook-ում Օկիտաշվիլիի էջում տեղադրված հաղորդագրությունում:

Չոխան Թրամփին կփոխանցեն «Ժողովրդավարական կառավարման զարգացում» միջազգային կազմակերպության նախագահ Բադրի Ցերցվաձեն և այդ կազմակերպության Վրաստանի ներկայացուցչության ղեկավար Նատալյա Զաքարեիշվիլին, որոնք պաշտոնապես հրավիրված են երդմնակալության արարողությանը:

Դոնալդ Թրամփի երդմնակալության արարողությունը սկսվելու է ուրբաթ՝ հունվարի 20-ին՝ Վաշինգտոնի ժամանակով առավոտյան ժամը 9:30-ին: