Եթե պետությունը հստակ պատվեր տա, հայ գիտնականը կարող է ցանկացած բարդ խնդիր լուծել. Սամվել Հարությունյան

Այսօր ՀՀ ԿԳՆ գիտության պետական կոմիտեի նախագահ Սամվել Հարությունյանը լրագրողներին ներկայացրեց 2016-ին կոմիտեի գործունեության վերաբերյալ ամփոփ տեղեկատվություն: Նա հայտնեց, որ անցկացվել են ՀՀ ռազմաարդյունաբերական հանձնաժողովին կից ռազմաատեխնիկական և գիտատեխնիկական խորհրդի նիստեր, նշանակվել են խորհրդի ենթահանձնաժողովների նախագահները:

Լրագրողներին հետաքրքրեց, թե, մասնավորապես, ի՞նչ ծրագրեր կան գիտական պոտենցիալը ռազմաարդյունաբերության ոլորտում կիրառելու վերաբերյալ, ի վերջո,  պաշտպանության նոր նախարարը գերակա է համարում ազգ-բանակ գաղափարախոսության համատեքստում գիտական պոտենցիալի օգտագործումը ռազմական նպատակներով:

Սամվել Հարությունյանը պատասխանեց, որ լիազորված չէ բացահայտել այդ ծրագրերը: Միայն ասաց, որ պաշտպանության ոլորտում իրականացվող ծրագրերը վերաբերում են ինչպես զինվորների կենցաղային պայմանների բարելավմանը, այնպես էլ ինժեներատեխնիկական, ռազմաատեխնիկական խնդիրների լուծմանը:

«Մի բան կարող եմ ասել, որ մեր հայ գիտնականները կարող են լուծել ցանկացած բարդ խնդիր պաշտպանական  ոլորտում, եթե լինեն ճիշտ ուղղորդված պատվերներ: Դա բազմիցս ենք ապացուցել: Այսօր էլ ունենք լավ հաջողություններ այդ ոլորտում»,- ասաց Սամվել Հարությունյանը` հավելելով, որ եթե լինի համապատասխան պատվեր, իրենք համապատասխան լուծումներ կառաջարկեն:

Նա հայտնեց նաև, որ պաշտպանության նախարարությունից որոշ  պատվերներ կան, անցյալ տարի 42 ծրագիր է ֆինանսավորվել: