Թուրքիայում ծեծել են այգում մարզվող հղիին

Թուրքիայում կանանց դեմ բռնությունները վերջ չունեն: Մանիսայի Թուրգութլու շրջանի այգում մարզվելիս 32-ամյա հղի Էբրու Թիրելին հարձակման է ենթարկվել անհայտ ինքնությամբ անձի կողմից:

Ըստ Demokrathaber-ի՝ մեքենայից իջած տղամարդը մոտեցել և սկսել է հարվածել կնոջը՝  պահանջելով այսուհետ այգում չմարզվել:

Շոկային վիճակում հայտնված կինը հիվանդանոցում պատմել է, որ երբ ինքը գետին է ընկնել, տղամարդը շարունակել է հարվածել իրեն, անգամ` երբ իմացել է իր` հղի լինելու մասին:

«Միակ բանը, ինչի մասին մտածում էի, երեխաս էր: Չհասկացա՝ ինչ կատարվեց: Անծանոթ մեկը մոտեցավ ու սկսեց ծեծել ինձ: Ընկա գետնին, գլուխս քարին դիպավ: Նա դեռ շարունակում էր փորիս հարվածել, հետո միանգամից փախուստի դիմեց»,- պատմել է կինը, ով դեպքից անմիջապես հետո զանգահարել է ամուսնուն:

Հիվանդանոցում ստուգումներից հետո հայտնի է դարձել, որ պտղի կյանքին վտանգ չի սպառնում:

Միջադեպից հետո համացանցում շարժում է սկսվել: Ի պաշտպանություն հղի կնոջ՝ համացանցի օգտատերերը տեղադրել են #Էբրու Թիրելին միայնակ չէ հեշթեգը: