Ես կողմ եմ, որ բոլորը ծառայեն. պաշտպանության փոխնախարար

ՀՀ պաշտպանության նախարարի տեղակալ Արա Նազարյանն այսօր ելույթով հանդես եկավ՝ ներկայացնելով «Զինվորական ծառայութjուն անցնելու մասին» ՀՀ օրենքում փոփոխություններ կատարելու հարցը: Նրան հարց ուղղեց ՀՀԿ խմբակցության պատգամավոր Խոսրով Հարությունյանը՝ կարևորելով, որ օրենքի նախագծով փորձ է արվում փակել այն սողանցքները, որոնք թույլ են տալիս խուսափել պարտադիր զինվորական ծառայությունից: Պատգամավորը հետաքրքրվեց, թե բժշկական համալսարանի՝ 18 տարին լրացած ուսանողներին է՞լ են վերաբերում փոփոխությունները:

«Որովհետև, եթե նա գնում է ծառայության, հետո ուզում է շարունակել իր ուսումը և ստանալ ռազմական բժշկի որակավորում, ապա այն պայմանը, որ կարող են կոչում ստանալ միայն օրդինատուրան ավարտելուց հետո, միանգամայն արդարացված է, և արդյոք նրանք չե՞ն զրկվելու քաղացիական ծառայության անցնելու իրավունքից»,- հարցրեց Հարությոնյանը:

Նազարյանը պատասխանեց, որ հետո հնարավոր է քաղաքացիական կյանքում ինտերնատուրան ավարտել, և եթե նա վճարում է, փոխհատուցում է, ապա վերահանձնում է քննությունները, հետո շարունակում:

Հարությունյանը հարցրեց նաև՝ պլանավորվո՞ւմ է կադրերի չափը, արդյոք ընդունվո՞ւմ են այնքան, որքան պահանջված է բանակի համար, թե՞ որքան ցանկանում են:

Նազարյանը պատասխանեց, որ բժշկական համալսարանի ռազմական բաժին ընդունվողները, ովքեր հետագայում հրաժարվում են այդ մասնագիտությունից, փոխում են ուղղվածությունը, այլևս չեն ծառայում: «Մենք պլանավորում ենք, որ պետք է, օրինակ, 25 ուսանող: Հետո, եթե ցանկանում են, պայմանագիր ենք կապում: Եթե նրանք հրաժարվում են, փոխում են իրենց միտքը, մեր ծրագրերը խախտվում են, եթե չեն ուզում շարունակել, քաղաքացիական կյանքում են իրենց ծառայությունները մատուցում, բայց չեն ծառայում»,- ասաց նա:

Իր մտահոգությունները հայտնեց նաև պատգամավոր Թևան Պողոսյանը և նշեց. «18 տարեկանը լրացել է, գնում եք, ծառայում եք, գալիս եք, հետո եք դառնում ռազմական բժիշկ: Սա պետք է լինի լուծումը»:

Պողոսյանը հարցրեց՝ ավելի հեշտ չէ՞ պայմանագիրը փոխել, որ անվճար սովորող ուսանողը, ով նաև բանակում չի ծառայում, ծանրուկշիռ անի և հրաժարվելու հնարավորություն չունենա:

Արա Նազարյանն ասաց, որ պայմանագրային հարթության մեջ հարցը չի կարգավորվի, անհրաժեշտ է օրենսդրական փոփոխություն: «Մարդկանց ֆանտազիան այն աստիճանի է զարգացած, որ ամեն սողանցքից օգտվում են: Ես կողմ եմ, որ բոլորը ծառայեն»,- ասաց նա: