Միտումն այն է, որ առաջնագծում ծառայեն շարքային կազմի բացառապես առողջ պարտադիր ժամկետային զինծառայողները. փոխնախարար

Այսօր ԱԺ-ում լրագրողների հետ զրույցում պաշտպանության փոխնախարար Գաբրիել Բալայանը անդրադարձել է ԲՀԿ պատգամավորների կողմից օրենսդրական նախաձեռնությանը, որով առաջարկվում է սահմանափակել առաջնագծում ծառայողների զինծառայության ժամկետը: Նշենք, որ օրենսդրական նախաձեռնությունը կառավարությունը մերժել է:

Գաբրիել Բալայանի խոսքով` մերժել են, քանի որ կա պլանավորման և պետական ֆինանսական միջոցների խնդիր: Կառավարության նիստում արդեն հավանության է արժանացել զինծառայողի կարգավիճակի մասին օրենքի նախագիծը, որով ամրագրվում է զինծառայողների տարիքը մինչև 40 տարեկան` գործող 36-ի փոխարեն:

Փոխնախարարը նշեց, որ քննարկման փուլում է մարտական հերթապահություն իրականանող զինծառայողների համար ծառայության ժամկետը նվազեցնելու հարցը:

«Միտումն այն է, որ առաջնագծում ծառայեն բացառապես առողջ շարքային կազմի պարտադիր ժամկետային զինծառայողները: Կփորձենք գտնել այն հնարավորությունը, որ նրանք ավելի կարճ ժամանակում ծառայեն` իրականացնելով մարտական խնդիրներ, իսկ մնացածները, ովքեր սահմանափակումներ ունեն, բայց պիտանի են զինծառայությւանը, կատարեն այլ գործառույթներ մի քիչ ավելի երկար ժամկետով, քան առաջնագծում ծառայողները»,- ասաց նա: