Պետք է հասնենք նրան, որ ՀՀ-ում քննությունների վերահանձնումն արգելվի. ԿԳ նախարար

Բուհերի ռեկտորներին խնդրել են վարձավճարները հնարավորինս պահել նույնը` հաշվի առնելով քաղաքացիների սոցիալական վիճակը: Այսօր լրագրողներին հայտնեց ՀՀ ԿԳ նախարար Լևոն Մկրտչյանը` պատասխանելով հարցին, թե արդյո՞ք բուհերի վարձավճարները հաջորդ տարի ավելանալու միտում ունեն:

Ըստ նախարարի` խնդիրը հետևյալն է` քանի որ բուհն ամբողջությամբ կախված է վարձավճարից, շահագրգռված չի լինում առաջադիմության պատճառով որևէ երեխայի  հեռացնել բուհից: «Նույնիսկ 4-5 անգամ անբավարար ստացած ուսանողին նորից հնարավորություն է տրվում քննության մտնել: Ինձ համար մեկ այլ կարևոր սկզբունք կա` պետք է հասնենք նրան, որ ՀՀ-ում քննությունների վերահանձնումներն արգելվեն, ինչպես եվրոպական լավագույն բուհերում: Այսինքն` վերահանձնման գործընթաց աշխարհում այլևս չկա. ուսանողը բաց թողեց քննությունը, պետք է մյուս տարի գա»,- ասաց Մկրտչյանը:

Նա նշեց նաև, որ քննությունների վերահանձնումն ազդում է կրթության որակի վրա: