ԱՄՆ-ի հետ ՌԴ-ի հարաբերություններն այնքան են ցածրացել, որ այլևս ցածրանալու տեղ չկա. Ռիժկով

ԱՄՆ ընտրություններում Թրամփի հաղթանակն ամենամեծ հարվածն էր Ուկրաինային. այսօր ՀՀ ԱԺ-ում լրագրողների հետ զրույցում ասաց ՌԴ Դաշնային խորհրդի անդամ Նիկոլայ Ռիժկովը։ «Նրանք աղոթում էին Քլինթոնի հաղթանակի համար»,- հավելեց նա՝ նշելով, որ Ուկրաինան Քլինթոնից հստակ սպասելիքներ ուներ, մինչդեռ` ինչպիսի՞ քաղաքականություն կվարի Թրամփն Ուկրաինայի հետ, դեռ պարզ չէ։

«Պորոշենկոն այդպես էլ չշնորհավորեց Թրամփին, իսկ դա ինչ-որ բանի մասին է խոսում»,- ընդգծեց Ռիժկովը:

Նրա խոսքով՝ Ռուսաստանում ժողովրդի մեծ մասը Թրամփին էր աջակցում, քանի որ Քլինթոնը հակառուսական դիրք էր գրավել և անընդհատ վատաբանում էր ՌԴ-ին, ինչը Թրամփը չէր անում։ «Դրա համար ժողովուրդը Քլինթոնի դեմ հակաթույն ուներ՝ ժողովուրդը մեծ մասամբ կողմ էր տրամադրված Թրամփին։ Նա մեր երկրի հասցեին ագրեսիվ ելույթներ չէր ունենում»,- ասաց Ռիժկովը։

Դիտարկմանը` արդյո՞ք սպասվում են փոփոխություններ ՌԴ-ԱՄՆ հարաբերություններում, նա արձագանքեց, որ փոփոխություններ պիտի լինեն, որովհետև ԱՄՆ-ի հետ ՌԴ-ի հարաբերություններն այնքան են ցածրացել, որ այլևս ցածրանալու տեղ չկա։

Անդրադառնալով պատժամիջոցների հանմանը՝ Ռիժկովն ասաց. «Պատժամիջոցների մասով առանձնապես սպասումներ չունեմ, բայց վստահ եմ, որ լավացում կլինի։ Ռուսաստանը տրամադրված է համագործակցության։ Մենք միշտ համարում ենք, որ հարևանները պետք է բարի լինեն, այլ ոչ թե կռվեն»։