ՄԻՊ աշխատակազմի երաշխիքներն ավելացվել են

«Մարդու իրավունքների պաշտպանի մասին» և հարակից այլ օրենքների նախագծի վերաբերյալ խորհրդարանան լսումների ընթացքում մարդու իրավունքների պաշտպան Արման Թաթոյանը համառոտ ներկայացրեց նախատեսվող փոփոխությունները: Նրա խոսքով՝ ավելացվել են ՄԻՊ աշխատակազմի երաշխիքները և մարդու իրավունքների պաշտպանին դիմելու հնարավորություն է ստեղծվել նաև ՀԿ-ների համար:

«Արգելք է նախատեսված` ՄԻՊ աշխատակցին կամ խոշտանգումների կանխարգելման կոմիտեի անդամներին հարցաքննության ենթարկելու հետ կապված, կամ, առանց ՄԻՊ-ի թույլտվության, այն հարցերով, որոնք ի հայտ են եկել գործի քննության ընթացքում»,- ասաց Թաթոյանը:

Քննարկմանը ներկա իրավապաշտպան Արթուր Սաքունցը Թաթոյանից հետաքրքրվեց՝ հաշվի առնելով նախորդ երեք ՄԻՊ-երի փորձը, որևէ կարգավորող դրույթ նախատեսվա՞ծ է` մարդու իրավունքների պաշտպանի հրաժարականի հետ կապված:

«Դիմումը տալուց հետո լավ կլինի, որ ԱԺ-ն անպայման լսի այդ դիմումի պատճառները, ձևական մոտեցում չցուցաբերվի, որովհետև եթե մարդը զբաղվում է մարդու իրավունքների պաշտպանությամբ, նրա իրավունքներն առաջինը պետք է պաշտպանված լինեն»,- ասաց իրավապաշտպանը:

Թաթոյանն արձագանքեց, որ այլ կարգավորումներ այդ հարցում նախատեսվում են, սակայն դեռ որևէ հստակ բան չկա, և հարցն ուսումնասիրությունների փուլում է: