Ամեն ինչ անում են, որ Բուդաղյանների գործը չհասնի դատարան. Հայկ Ալումյան

Բուդաղյանների ընտանիքի շահերի պաշտպան, փաստաբան Հայկ Ալումյանի խոսքով` Սյունիքի նախկին մարզպետ Սուրիկ Խաչատրյանի տան մոտ տեղի ունեցած միջադեպի փաստով հարուցված քրեական գործի նախաքննությունն արհեստականորեն ձգձգվում է: Ավելին` պաշտպանը դժգոհում է, որ նախաքննական մարմինն ութուկես հատորանոց գործի նյութերից, որը բաղկացած է մոտ 2500 թերթից, իրեն տրամադրել է միայն 210 էջը:

Ըստ նրա` նախաքննությունն ընթանում է միայն այն մասով, թե իբր Արտակ Բուդաղյանը սպառնալիքներ է հնչեցրել:

«Արտակի մասով ոչինչ չի մնացել քննելու, պարզապես նախաքննական մարմինը մի տարբերակ է փնտրում, որ գործը նախաքննության ընթացքում ավարտվի և չհասնի դատարան»,- ասաց պաշտպանը և հավաստիացրեց, որ, միևնույն է, գործը հասնելու է դատարան, և իրենք ամեն ինչ անելու են, որ այն քննվի հրապարակային ու օբյեկտիվ: 

Արտակ Բուդաղյանի նկատմամբ համաներում է տարածվում, սակայն, պաշտպանի խոսքով,  իրենք հրաժարվել են համաներումից, քանի որ Արտակն այդ հանցագործությունը չի կատարել: Բացի այդ` փաստաբանը հույս ունի, որ գոնե այդ դրվագով գործը կհասնի դատարան: «Նրանք չեն կարող ամեն բան ստվերում պահել»,- նշեց նա: