Հայ Դատը Թուրքիայում պատգամավորների ձերբակալությունների վերաբերյալ հրատապ կոչով է հանդես եկել

ԱՄՆ Հայ Դատի գրասենյակը Թուրքիայում քրդամետ Ժողովուրդների դեմոկրատական կուսակցության 11 պատգամավորների ձերբակալության վերաբերյալ հրատապ կոչով է հանդես եկել:

Կառույցն իր ֆեյսբուքյան էջում կոչ է արել այդ հարցով անհապաղ դիմել ԱՄՆ պետքարտուղար Ջոն Քերիին: «Ուշ երեկոյան Թուրքիայի կառավարությունը գործողություններ է սկսել քրդամետ Ժողովուրդների դեմոկրատական կուսակցության դեմ: ANCA-ն (ԱՄՆ Հայ Դատի գրասենյակը) իր կողմնակիցներին խնդրում է նամակով դիմել ԱՄՆ պետքարտուղար Ջոն Քերիին՝ հորդորելով նրան վճռական քայլեր ձեռնարկել Էրդողանի՝ Թուրքիայում մնացած վերջին դեմոկրատական կուսակցությանը լռեցնելու ջանքերի դեմ»,-մասնավորապես ասվոմ է կառույցի հայտարարության մեջ:

Հայ Դատն իր էջում տեղադրել է նաև լուսանկար՝ «Ազատություն՝ ԺԴԿ-ին» (#FreeHDP) գրությամբ: