Ի՞նչ տույժեր են կիրառվում անչափահասներին ծխախոտ կամ ալկոհոլ վաճառողների նկատմամբ

Հայտնել ենք, որ այսօր` կառավարության նիստից առաջ, վարչապետ Կարեն Կարապետյանը հանձնարարեց տույժեր կիրառել 18 տարին չլրացած անձանց ծխախոտ ու ալկոհոլ վաճառողների նկատմամբ:

Ստացվում է, որ ներկայումս չեն կիրառվում անչափահասներին ծխախոտ ու ոգելից խմիչքների վաճառքն արգելող` գործող օրենքի դրույթները, ինչն էլ գործադիրի ղեկավարին մտահոգելու տեղիք է տվել:

Հետաքրքիր է` գործող օրենսդրությամբ ի՞նչ տուժեր են սահմանված անչափահասներին ծխախոտ ու ալկոհոլ վաճառողների նկատմամբ:

Վարչական իրավախախտումների վերաբերյալ ՀՀ օրենքի 158-րդ հոդվածի համաձայն՝ 18 տարին չլրացած անձանց ծխախոտ, ալկոհոլային խմիչքներ, թմրամիջոցներ և հոգեմետ նյութեր, սարսափ կամ պոռնոգրաֆիա բովանդակող գրականություն և տեսաերիզներ վաճառելն առաջացնում է տուգանքի նշանակում վաճառողի նկատմամբ` սահմանված նվազագույն աշխատավարձի հիսնապատիկի չափով:

Իսկ 18 տարին չլրացած անձանց ծխախոտի, ալկոհոլային խմիչքների, թմրամիջոցների և հոգեմետ նյութերի, սարսափ կամ պոռնոգրաֆիա բովանդակող գրականության և տեսաերիզների վաճառքի մեջ ներգրավելն առաջացնում է տուգանքի նշանակում` սահմանված նվազագույն աշխատավարձի հարյուրապատիկի չափով:

«Վարչական իրավախախտումների վերաբերյալ» նոր օրենսգրքի նախագծային տարբերակում ևս ամրագրված է վաճառքն արգելող դրույթը: Նոր օրենսգրքի 515-րդ հոդվածում, որը վերաբերում է ծխախոտային արտադրատեսակի կամ ոգելից խմիչքների իրացման կանոնները խախտելուն, ամրագրված է.

1. Ծխախոտային արտադրատեսակի կամ ոգելից (ալկոհոլային) խմիչքների իրացման կանոնների խախտումն առաջացնում է տուգանք` երեսուն հազար դրամից հիսուն հազար դրամի չափով:

2. Տասնութ տարին չլրացած անձի ծխախոտ կամ ոգելից (ալկոհոլային) խմիչքներ վաճառելն առաջացնում է տուգանք` քառասուն հազար դրամից վաթսուն հազար դրամի չափով:

3. Տասնութ տարին չլրացած անձի ծխախոտի կամ ոգելից (ալկոհոլային) խմիչքների վաճառքի մեջ ներգրավելն առաջացնում է տուգանք` հիսուն հազար դրամից հարյուր հազար դրամի չափով:

4. Սույն հոդվածի 1-4-րդ մասերով սահմանված արարքներից որևէ մեկը, վարչական տույժ նշանակելու վերաբերյալ որոշման անբողոքարկելի դառնալուց հետո, մեկ տարվա ընթացքում կրկին կատարելն առաջացնում է տուգանք՝ տվյալ արարքի համար սույն հոդվածի համապատասխան մասով սահմանված տուգանքի չափի կրկնապատիկի չափով: