Տուգանք կիրառել 18 տարին չլրացած անձանց ծխախոտ ու ալկոհոլ վաճառողների նկատմամբ. վարչապետ

Այսօր` կառավարության նիստից առաջ, վարչապետ Կարեն Կարապետյանը հանձնարարական տվեց, որը վերաբերում էր առողջ ապրելակերպին: Նա նշեց, որ հասարակությունից ստացում են արձագանքներ 18 տարին չլրացած անձանց ծխախոտ և ալկոհոլային խմիչքներ վաճառելու կապակցությամբ: Ըստ վարչապետի` իրականացված ուսումնասիրությունները բավականին մտահոգիչ են, և պետք է տույժեր կիրառել 18 տարին չլրացած անձանց ծխախոտ ու ալկոհոլ վաճառողների նկատմամբ:

Նա հանձնարարեց ՏԻՄ-երին` պատշաճ վերահսկողություն սահմանել այդ երևույթի նկատմամբ, ուշադրություն դարձնել տարբեր սրճարանների, ակումբների և զվարճանքի այլ վայրերի: Վարչապետի խոսքով` արդեն հանձնարարել է սպորտի նախարարին` կազմակերպել քարոզչություն առողջ ապրելակերպի վերաբերյալ: «Պետք է գիշերային ակումբներում, զվարճանքի կենտրոններում մտցնել տարիքային սահմանափակում»,- ասաց Կարեն Կարապետյանը: