Հարկատուներից հավաքագրված գումարները ծախսվելու են նպատակային, արդյունավետ. վարչապետ

Ազգային ժողովի մշտական հանձնաժողովներում այսօր մեկնարկեցին 2017 թվականի պետական բյուջեի քննարկումները:

Բյուջետային քննարկումների մեկնարկին վարչապետ Կարեն Կարապետյանը հանդես եկավ ելույթով: Նա վստահեցրեց, որ հարկատուներից հավաքագրված գումարները ծախսվելու են նպատակային, արդյունավետ, իսկ արդյունքները տեսանելի են լինելու հանրության համար: Կարապետյանի խոսքով՝ իրենց կողմից ձեռնարկված քայլերով թույլ չեն տալու բյուջեի պակասուրդի աճ, բիզնեսին չեն ճնշելու:

«Որպեսզի բիզնեսը կարողանա վերարտադրվել, գալիք տարվա համար պետք է ստեղծենք նորմալ պլատֆորմ` ավելի աշխույժ տնտեսական իրավիճակ ակնկալելու համար»,- ասաց վարչապետը:

Ըստ նրա` վերջին երկու տարիներին ՀՀ տնտեսություն են ներթափանցել ցնցումներ, որոնք պայմանավորված են ՌԴ տնտեսության անկմամբ և տրանսֆերտների նվազմամբ: Հարկաբյուջետային քաղաքականությունը եղել է հակացիկլիկ, որը հանգեցրել է պետական պարտքի ավելացմանը: Կարեն Կարապետյանը նշեց, թե իրենց խնդիրն է բոլոր անհրաժեշտ քայլերը կատարել, որպեսզի մակրոտնտեսական կայունություն ապահովեն և նվազող բյուջեի միջոցով պարտքի կայունացման հասնեն: Նա խոստովանեց, որ նշված ցուցանիշին հասնելու համար իրենցից բավական ջանքեր կպահանջվեն, բայց վստահեցրեց, որ ամեն ինչ անելու են դրան հասնելու համար: