Համազգային թատրոնից գողություն կատարողները Թատերական ինստիտուտի ուսանողներն են

Տեղեկացրել էինք, որ ապրիլի 23-ին Սոս Սարգսյանի անվան համազգային թատրոնից գողություն էր կատարվել: Գողացել էին թատրոնի շենքի կառուցման համար նախատեսված` հանգանակության գումարը` 3 մլն դրամ, ինչպես նաև համակարգիչներ ու թատրոնի տնօրեն և գեղարվեստական ղեկավար Վարդան Մկրտչյանի անձնական հեռախոսները, ժամացույցները, գրիչը:

Yerkir.am-ի հետ զրույցում Վարդան Մկրտչյանը հայտնեց, որ դեպքի առնչությամբ հարուցված քրեական գործի շրջանակներում 3 անձ է կալանավորվել:

«Ցավոք, տղաները մեր` Թատերական ինստիտուտի ուսանողներն են: Վերջերս նրանց տեսա փողոցում և ապշել էի` հետո պարզվեց, որ բաց կալանքի տակ են գտնվում: Ի դեպ, տղաները վերականգնել են դասերը և շարունակում են սովորել մեզ մոտ: Նրանց ծնողները որոշակիորեն փոխհատուցել են մեզ, սակայն կան որոշ ապրանքներ, որոնք առգրավված են»,- ասաց Մկրտչյանը:

Նա տեղեկացրեց նաև, որ դեպքի կապակցությամբ հարուցված քրեական գործով առաջին դատական նիստը տեղի կունենա նոյեմբերի 4-ին: