Հայաստանում կեղծ դեղեր չեն արտադրվում. առողջապահության փոխնախարար

Այսօր ԱԺ արտահերթ նիստում քննարկվում էր 2015թ. Մոսկվայում ստորագրված «ԵՏՄ շրջանակներում բժշկական արտադրատեսակների և դեղամիջոցների շրջանառության միասնական սկզբունքների ու կանոնների մասին» համաձայնագիրը:

Հիմնական զեկուցող` առողջապահության փոխնախարար Սերգեյ Խաչատրյանին հարց ուղղեց ՕԵԿ-ական պատգամավոր Մհեր Շահգելդյանը` կեղծվող դեղերի դեմ պայքարի մասին: Փոխնախարարը նշեց, որ ՀՀ-ում արտադրվում է շրջանառվող դեղերի ընդամենը 4 տոկոսը, այսինքն` կեղծվող դեղերը Հայաստանի տարածքից դուրս են արտադրվում:

«Հայաստանում կեղծ դեղեր չեն արտադրվում` միանշանակ: Արվել են լուրջ հետազոտություններ ԱԱԾ և այլ իրավասու մարմինների կողմից: Կեղծ դեղերի դեմ պայքարը պետք է տանեն այն երկրները, որտեղ այդ դեղերն արտադրվում են: Մենք ունենք վերահսկողություն դեղերի օրինական դաշտի վրա, սակայն կեղծ դեղերի վրա մենք վերահսկողություն չունենք»,- ասաց փոխնախարարը՝ հավելելով, որ ներկայացվող համաձայնագիրը հնարավորություն կտա հետագայում ստեղծելու մեխանիզմներ այդ խնդիրների դեմ պայքարելու համար:

Փոխնախարարի խոսքով` առողջապահության տեսչական մարմինների լիազորությունները շատ թույլ են, խնդիր կա ուժեղացնելու այդ լիազորությունները: