Բոլորս անուն առ անուն գիտենք կեղծ դեղեր ներկրող հայ մաֆիոզներին. Նաիրա Զոհրաբյան

Այսօր ԱԺ նիստի ընթացքում «Բժշկական նշանակության արտադրանքի կեղծման և հանրային առողջության համար վտանգ ներկայացնող նմանատիպ հանցագործությունների մասին»` Եվրոպայի խորհրդի կոնվենցիայի վավերացման հարցի քննարկման ժամանակ ԲՀԿ խմբակցության ղեկավար Նաիրա Զոհրաբյանը նշեց. «Բոլորս գիտենք անուն առ անուն Հայաստանի դեղ ներկրող մաֆիոզներին, հանցագործներին, որոնք պետք է վաղուց բանտ նստած լինեին, որովհետև նրանք մանկական սնունդ են կեղծում, նրանք մանկական դեղ են կեղծում, ներկրում են կեղծ դեղեր, որոնց ազդող կոմպոնենտը կա\'մ ընդհանրապես չկա, կա\'մ հակառակ ազդեցությունն են ունենում»:

Պատգամավորը առողջապահության փոխնախարար Սերգեյ Խաչատրյանից հետաքրքրվեց, թե կոնվենցիայի վավերացման արդյունքում ինչպե՞ս կկարողանանք քրեական պատասխանատվություն կիրառել, ո՞վ է բռնելու  մանկական կեղծ սնունդ ներկրող հանցագործների` հայ մաֆիոզների ձեռքը:

«Հիմա ի՞նչ երաշխիքներ ունենք, որ, վավերացնելով այս կոնվենցիան, ինչն անպայման կանենք, կկարողանանք քրեական պատասխանատվության ենթարկել բոլոր հայկական դեղային մաֆիոզներին, որոնց անուն առ անուն բոլորս էլ հրաշալի գիտենք»,- ասաց Զոհրաբյանը:

Ըստ նրա` խոշոր դեղագործական ընկերություններում արտադրում են երրորդ երկրների համար շատ ավելի էժան դեղեր, որոնց ազդող կոմպոնենտը գրեթե զրոյական է:

Հիմնական զեկուցող` առողջապահության փոխնախարար Սերգեյ Խաչատրյանը նշեց, թե, ըստ իրեն, հարցը քրեական մարմիններին է վերաբերում, դա բարդ խնդիր է, որը միայն առողջապահության դաշտում չէ: «Վերաբերում է նաև հարկային դաշտին, գների կարգավորման դաշտին: Միասին լուծման դեպքում կարող ենք երաշխիք ունենալ, որ այս հարցը էլ չի բարձրացվի»,- ասաց նա:

Փոխնախարարը նշեց նաև, որ ինքը համաձայն է ազգային ծրագիր մշակելու գաղափարին: