Հողը թեթև լինի այս օրենսգրքի և մեր ընտրական համակարգի վրա. Թևան Պողոսյան

Այսօր ԱԺ արտահերթ նիստում շարունակվեցին պատգամավորների ելույթները ԸՕ փոփոխությունների նախագծի մասին: «Ժառանգություն» խմբակցության պատգամավոր Թևան Պողոսյանը նախ մեջբերեց ԸՕ փոփոխությունների նախագծում կառավարության ներկայացրած եզրակացությունները, որոնք սոցիալական ոլորտում չեզոք ազդեցություն կունենան: Այսինքն, ըստ Պողոսյանի, ԸՕ-ն որևէ կերպ չի անդրադառնալու մարդկանց սոցիալական վիճակի վրա, նաև` ազդեցություն չի ունենալու առողջապահության ոլորտի վրա :

«Հուսով եմ, որ այս ԸՕ-ն ընդունելուց հետո ազդեցություն առողջապահության ոլորտի վրա այլևս չի լինի: Չեն լինի այնպիսի դեպքեր, ինչպիսիք եղան հետընտրական Էջմիածնում կամ Վանաձորում, որոնք այդ ժամանակ ազդեցին առողջապահության ոլորտի վրա»,- ասաց Պողոսյանը:

Նա քննադատեց նախագիծը` ասելով, որ այն չի արտահայտում քաղաքական մրցակցություն: Վերջում Թևան Պողոսյանն այսպես ավարտեց ելույթը. «Հողը թեթև լինի այս օրենսգրքի և մեր ընտրական համակարգի վրա»: