Չենք կարողանում հասկանալ՝ հեռախոսազանգերի վրա ծախսված մեծ գումարները նպաստե՞լ են ծրագրի արդյունավետությանը. Թևան Պողոսյան

Խորհրդարանն այսօր նախաձեռնել է լսումներ Հայաստանում ծրագրային բյուջետավորման ներդրման վերաբերյալ: Ծրագրային բյուջետավորման նպատակն է բարձրացնել բյուջետային գործընթացի արդյունավետությունը, բյուջեի թափանցիկությունը և բարելավել բյուջետային գործընթացի հաշվետվողականությունը:

«Ժառանգություն» խմբակցության պատգամավոր Թևան Պողոսյանը հարց ուղղեց հիմնական զեկուցող՝ ֆինանսների փոխնախարար Պավել Սաֆարյանին, թե արդյո՞ք ծրագրային բյուջետավորման մեջ կներդրվեն նաև որակական ցուցանիշների մասին տվյալներ: «Օրինակ՝ գրվում է, որ, ասենք, հարյուր հազար դրամ է ծախսվել հեռախոսազանգեր կատարելու վրա, բայց չենք կարողանում հասկանալ՝ այդ հարյուր հազար դրամը, որ ծախսվել է զանգեր կատարելու համար, նպաստե՞լ է այդ ծրագրի արդյունավետությանը»,- ասաց պատգամավորը:

Պավել Սաֆարյանը համաձայնեց Թևան Պողոսյանի դիտարկման հետ՝ ասելով, որ ԱԺ-ում էլ եղել են այդպիսի քննարկումներ, թե, օրինակ, ինչո՞ւ այսինչ նախարարությունը կամ գերատեսչությունը այդքան գումար է ծախսում գույք ձեռք բերելու համար: Փոխնախարարը համաձայնեց, որ այդ քննարկումները պետք է լինեն արդյունքի վրա հիմնված: