Ես լրջագույն առաջարկներ եմ անում, Դուք ինձ թեթև ձևով ցրում եք. Բագրատյանը՝ Միրումյանին

Այսօր ԱԺ արտահերթ նիստում քննարկվում է վերափոխված հարկային նոր օրենսգրքի նախագիծը երկրորդ ընթերցմամբ ընդունելու հարցը:

ՀԱԿ խմբակցության պատգամավոր Հրանտ Բագրատյանը հարց ուղղեց հիմնական զեկուցող` ՊԵԿ փոխնախագահ Վախթանգ Միրումյանին: Նա նախ նշեց, որ դժգոհ է Միրումյանի պատասխաններից, որովհետև դրանցում կա իր հանդեպ «ձեռառնոցի ու ցինիզմ»: Բագրատյանն առաջարկել էր բացառել սահմանի վրա ԱԱՀ գանձելը: Շատ հարցերի էլ պատասխան էր ստացվել, թե միջազգային պրակտիկայում ընդունված է, այդ պատճառով նման կետ են առաջարկում:

«Ես ձեզ լրջագույն առաջարկներ եմ անում, Դուք ինձ թեթև ձևով ցրում եք: Բացատրեք, թե ինչո՞ւ պետք է Հայ Առաքելական եկեղեցին հարկ չտա: Աշխարհը փոխվել է»,- դժգոհեց Բագրատյանը:

Վախթանգ Միրումյանը պատասխանեց, որ Հայ Առաքելական եկեղեցուն հարկելը բեռ կլինի կրոնական կազմակերպությունների համար: Ինչ վերաբերում է սահմանին ԱԱՀ չգանձելուն, ապա, նրա խոսքով, եթե կա տարբերակ այդ հարցը լուծելու, ապա ՊԵԿ-ը պատրաստ է դա քննարկել, սակայն սահմանին ԱԱՀ գանձելը էական մաս է պետբյուջեի եկամուտների կառուցվածքում, և դրանից հրաժարվելը մեծ բեռ կլինի բյուջեի համար:

Բագրատյանն արձագանքեց, որ բավարարված չէ Միրումյանի պատասխաններով: