Ես խնդիր չունեմ Կարեն Կարապետյանի հետ. Դավիթ Լոքյան

ՀՀ տարածքային կառավարման և զարգացման նախարարի պաշտոնակատար Դավիթ Լոքյանը ԱԺ-կառավարություն հարցուպատասխանից առաջ լրագրողներին ասաց, որ որևէ խնդիր չի տեսնում նոր կառավարությունում, մասնավորապես` Կարեն Կարապետյանի հետ աշխատելու մեջ:

«Ես որևէ խնդիր չեմ տեսնում աշխատանքի մեջ, իսկ եթե խնդիր կա, ճշտեք Կարեն Կարապետյանից»,- ասաց նա` անդրադառնալով մամուլի այն հրապարակմանը, թե Կարեն Կարապետյանը չի ցանկանում Լոքյանին տեսնել իր ղեկավարած կառավարության կազմում:

Լոքյանն ասաց նաև, որ չի կարծում, թե անցանկալի անձ է: Նախարարի պաշտոնակատարն ընդգծեց, որ վեց ամիս է, ինչ կառավարության կազմում է, և այդ ընթացքում կարևոր աշխատանքներ են կատարվել: «Գոնե մեր բնագավառում ռազմավարություն է ընտրվել` տարածքների համաչափ զարգացման, ֆինանսական համահարթեցման»,- ասաց նա:

Հարցին, թե Հովիկ Աբրահամյանը բազմաթիվ աշխատանքներ էր կատարել, ինչո՞ւ հրաժարական տվեց, Լոքյանը պատասխանեց, որ պետք է հարցնել ղեկավարող քաղաքական ուժից: