Արամայիս Գրիգորյանի հետ որևէ խնդիր չունեմ. Արծվիկ Մինասյան

«Ազատություն» ռադիոկայանի ֆեյսբուքյան ասուլիսի ժամանակ բնապահպանության նախարար Արծվիկ Մինասյանը հավաստիացրեց, որ բնապահպանության նախկին նախարար Արամայիս Գրիգորյանի հետ որևէ խնդիր չունի:

Նշենք, որ մամուլում լուրեր էին տարածվել, թե Արարատի մարզի համայնքապետերը հրաժարվել էին կատարել Արծվիկ Մինասյանի հրահանգները` հրդեհ մարելու հետ կապված:

Մինասյանն, այնումամենայնիվ, չհերքեց, որ միջադեպ եղել է: «Երբ ես հրահանգեցի, որ վերևում օգնության կարիք կա, և անհրաժեշտ է, որ խումբ գնա, համայնքապետերից մեկն էր երևի, որ ասաց` ոչ, մենք չենք ենթարկվում, մենք ունենք մեկ ղեկավար, և այդ ղեկավարի ցուցումը պետք է լինի: Ես ասել եմ, որ` եթե դուք ձևականությունների հետևից եք ընկել, կարող եք հեռանալ այստեղից և չխանգարել, որպեսզի մյուսներն աշխատեն»,- պատմեց նա:

Մինասյանը սա  բնապահպանության նախկին և ներկայիս նախարարների միջև կռիվ չի համարում: Նա նշեց, որ, անկախ նրանից, թե իր նախկին պաշտոնյա ընկերներն ինչ են արել, իր խնդիրն է բարելավել և ավելի որակյալ դարձնել այս համակարգը:

«Իմ առաջին քայլով, որպես բնապահպանության նախարար, Արամայիս Գրիգորյանին ոսկե մեդալով եմ պարգևատրել: Ես այդպիսի խնդիր չունեմ նրա հետ»,- նշեց նախարարը: