Ապրիլին վիրավորված զինվորի ինտենսիվ բուժման համար գումար է հարկավոր

Ապրիլի 7-ին հրազենային ծանր վնասվածք ստացած ժամկետային զինծառայող Արման Լազգիյանը հիմա բուժումը շարունակում է Գերմանիայում՝ Համբուրգի կլինիկայում:

Yerkir.am-ի հետ զրույցում «Բարև Երևան» խմբակցության անդամ Անահիտ Բախշյանը հայտնեց, որ Լազգիյանը դեռևս չի տեղափոխվել վերականգնողական կենտրոն:

«Ես Արմանի հոր հետ եմ կապ պահպանում, ով նույնպես Գերմանիայում է: Գիտենք, որ տղային վիրահատել էին պառկելախոցի համար, և վիրահատությունից հետո վերքը, կարծես, փակվում է: Խնդիրն այն է, որ Արմանին ինտենսիվ վերականգնողական կենտրոն տեղափոխելու համար մեծ գումար է անհրաժեշտ, որն այդպես էլ չի հավաքվում»,- ասաց Բախշյանը:

Նա տեղեկացրեց նաև, որ Արմանն արդեն նստում է, մնում է` շարժողունակության մյուս խնդիրներն էլ լուծվեն:

Հիշեցնենք, որ 19-ամյա զինծառայողը վիրավորում է ստացել Թալիշում. գնդակը մտել է կոկորդից, ողնաշարով դուրս եկել՝ վնասելով կերակրափողը, շնչափողը, ձայնալարերը, ողնաշարը, ողնուղեղը: Նրան տեղափոխել են Մատաղիս, հետո` Մարտակերտ, այնուհետև` ուղղաթիռով հասցրել Երեւան: Լազգիյանը մի քանի վիրահատությունների է ենթարկվել, հետո տեղափոխվել Գերմանիա` բուժումը շարունակելու:

***

HSBC բանկում Արման Լազգիյանի անունով բացվել են հաշվեհամարներ՝

217-006057517001 ՀՀ դրամ

006057517101 ԱՄՆ դոլար

006057517102 ԵՎՐՈ

006057517103 ՌԴ ռուբլի

SWIFT: MIDLAM22