ՃՏՊ-ից տուժած 16 զինծառայող է տեղափոխվել հիվանդանոցներ. մանրամասներ

Տեղեկացրել էինք, որ օգոստոսի 15-ին` ժամը 10.15-ին, ահազանգ է ստացվել, որ Երևանի Հյուսիսային ավտոկայանում՝ R&V կոմֆորտ խանութ-սրահի մոտակայքում, տեղի է ունեցել ՃՏՊ, կան տուժածներ:

Yerkir.am-ի տեղեկություններով՝ վթարի հետևանքով կողաշրջվել է ՊՆ-ին պատկանող Sadko մակնիշի ավտոմեքենան:

Yerkir.am-ի հետ զրույցում Կենտրոնական կլինիկական հոսպիտալի պետ Արամ Ասատուրյանը հայտնեց, որ իրենց մոտ է տեղափոխվել 9 զինծառայող, որոնց հետազոտել են: «Նրանք տարբեր աստիճանի մարմնական վնասվածքներ են ստացել, սակայն, բարեբախտաբար, նրանցից ոչ մեկի վիճակը ծանր չէ, և վնասվածքներն այնպիսին չեն, որ նրանց կյանքին վտանգ սպառնա»,- ասաց նա:

Նշենք նաև, որ 7 զինծառայող էլ տեղափոխվել է «Գրիգոր Լուսավորիչ» բժշկական կենտրոն, որտեղից էլ մեզ հետ զրույցում նշեցին, որ զինծառայողներին հետազոտում են, և բարեբախտաբար, այնտեղ էլ չկան ծանր վիճակում գտնվող տուժածներ: