Պյոտր Սվիտալսկին ասաց, թե որ դեպքում փող կտան ընդդիմությանն ու իշխանությանը

Այսօր Հայաստանում ԵՄ պատվիրակության ղեկավար, դեսպան Պյոտր Սվիտալսկին լրագրողներին ներկայացրեց ԵՄ արտաքին եւ անվտանգության քաղաքականության համաշխարհային նոր ռազմավարությունը:

Անդրադարձ եղավ ԸՕ փոփոխություններին և դրա համար պահանջվող անհրաժեշտ ֆինանսավորմանը, մասնավորապես` թե այդ ֆինանսավորման որ մասն է պատրաստ տրամադրել ԵՄ-ն:

Պյոտր Սվիտալսկին ուրախ էր, որ համաձայնություն ձեռք բերվեց իշխանության և ընդդիմության միջև, և առաջիններից մեկն էր, որ շնորհավորեց այդ համաձայնության կապակցությամբ թե\' իշխանությանը, թե\' ընդդիմությանը: Դեսպանը նշում է, որ կան խնդիրներ` կապված ԸՕ-ի հետ, սակայն այն համաձայնությունը, որը ձեռք է բերվել կառավարության և ընդդիմության միջև, պատմական նշանակություն ունեցող պայմանավորվածություն է:

Անցնելով ԸՕ փոփոխությունների համար անհրաժեշտ ֆինանսական մասին, որը կառավարությունը դեռ չի կարողացել հայթայթել, Պյոտր Սվիտալսկին նշեց, որ ԵՄ-ն պատրաստ է զգալի օժանդակություն ցուցաբերել, որ ԸՕ փոփոխություններն ի կատար ածվեն, և որ կան մի շարք պետություններ,  որոնք ևս պատրաստ են ֆինանսապես աջակցել:

«Ես բնույթով լավատես եմ, հուսով եմ, որ այն կյանքի կկոչվի, որովհետև սահմանադրական փոփոխությունները դրականորեն կանդրադառնան Հայաստանի զարգացման վրա: Մեր աջակցությունը  քննարկվում է, կառավարության հետ լուրջ երկխոսություն ենք սկսել: Պետք է օժանդակության միասնական լայն համակարգ մշակենք  մինչև 2020-ը: Հուսանք` շատ լավ ծրագիր կունենանք հետագա տարիների համար: Մեզանից  պահանջվում է ուշադրություն դարձնել մեր գործընկեր պետության կարքիներին, սակայն շահագրգիռ կողմերից ակնկալվում են առավել մեծ ջանքեր և շահագրգռվածություն այդ ուղղությամբ: Ես հնարավորություններ եմ տեսնում մեր` զարգացման աջակցությունը Հայաստանին էլ ավելի մեծացնելու համար, բայց դա մեծ չափով կախված կլինի  նրանից, թե ինչքան արդյունավետ է եղել մեր օժանդակությունը մինչ այժմ,  որքան արդյունավետ է ընթանում Հայաստանի առաջընթացը: Մեր  օժանդակության տրամադրումը պայմանական է և կախված կոնկրետ չափանիշների կատարումից»,- ասաց Պյոտր Սվիտալսկին: