Հայաստանի ու Վատիկանի կողմից համատեղ հայտարարությունն արդեն պատրաստ է. Հռոմի պապի խոսնակ

Այսօր լրագրողների հետ կրկին հանդիպեց Հռոմի պապի խոսնակ մոնսինյոր Ֆեդերիկո Լոմբարդին:

Ամփոփելով Էջմիածնում տեղի ունեցած միջոցառումը` Սուրբ պատարագը, նա նշեց, որ այն էկումենիկ իրողության գագաթնակետն էր, որի ժամանակ  կարևոր` տիեզերական  պահեր եղան: Մասնավորապես բնութագրական էր Պապի կողմից հնչեցրած վերջին խոսքն ուղղված Հայոց Կաթողիկոս Գարեգին Բ-ին` «խնդրում եմ օրհնել ինձ, Կաթողիկե եկեղեցին, մեր միասնական ուղին»:

«Իսկապես, մեծ քայլ էր միասին աղոթելը, մեր փորձառությունը հայ առաքելական եկեղեցու հետ կիսելը»,- նշեց Ֆեդերիկո Լոմբարդին:

Նրա խոսքով` արդեն  պատրաստ է համատեղ հայտարարությունը, որը կարվի Հայաստանի ու Վատիկանի կողմից:

Լրագրողների այն հարցին, թե ինչն է զարմացրել կամ  զայրացրել Պապին Հայաստանում, Ֆեդերիկո Լոմբարդին նշեց, որ պապի համար որևէ բան խնդրահարույց չի եղել: Նա ամեն տեղ գրկաբաց էր ընդունվում հայ ժողովրդի կողմից, Հայ առաքելական եկեղեցու կողմից:

«Նա այստեղ հյուր է, նա միշտ գտնվել է կաթողիկոսի տանը ու իրեն զգում է ինչպես սեփական տանը: Ամեն ինչ շատ լավ էր: Հայ առաքելական եկեղեցու հետ հանդիպումներում խնդիր բնավ չկար»,- ասաց նա: