Մահացած նորածնի մոտ եղել է տարածուն ինֆեկցիա. պարզաբանում է բժիշկը

Տեղեկացրել էինք, որ, «Փաստինֆո»-ի տեղեկություններով, օրերս նորածին է մահացել «Արմենիա» բժշկական կենտրոնում։ Արարատի մարզի 32-ամյա բնակչուհին հունիսի սկզբներին բժշկական կենտրոնում ծննդաբերել է տղա երեխա, ով ապրել է մեկ օր։ Մայրը բժշկուհուն է մեղադրում նորածին որդու մահվան մեջ։

Yerkir.am-ի հետ զրույցում Պերինատոլոգիայի, մանկաբարձության և գինեկոլոգիայի ինստիտուտի տնօրեն Ռազմիկ Աբրահամյանը նշեց, որ դեպքը տեղի է ունեցել հունիսի 3-ին:

«Դեպքի մասին տեղյակ են քննչական մարմինները, և հիմա ախտաբանաանատոմիական հետազոտություն է իրականացվում: Նախնական տվյալներով` երեխայի մոտ տարածուն ինֆեկցիա էր` սեպսիս, որի մասին գիտեին ծնողները, իսկ թոքերում կար պնևմոնիա: Երեխայի արյունը վերցրել են և արյան մեջ եղել է սեպսիս կոչվածը` ներարգանդային վարակում է եղել»,- ասաց Աբրահամյանը:

Նա նշեց նաև, որ բժշկուհին ասել է, որ նորածնի ծնողները ժպտադեմ են հեռացել հիվանդանոցից, քանի որ նրանց բացատրել են` խնդիրը որն է: «Բժշկուհին հանրապետության լավագույն մանկական բժիշկն է: Պետք չէ անընդհատ բժիշկներին մեղադրել, սպասենք հետազոտության պատասխաններին»,- ասաց Աբրահամյանը: