«Հետ կուղարկեմ». Էրդողանը դարձյալ սպառնացել է ՀՀ քաղաքացիներին

Տեղեկացրեցինք, որ Թուրքիայի նախագահ Ռեջեփ Թայիփ Էրդողանը ելույթ է ունեցել «Սաբահաթթին Զաիմ» համալսարանում՝ անդրադառնալով Գերմանիայի խորհրդարանի կողմից Հայոց ցեղասպանության ճանաչմանը:

Ըստ Demokrathaber-ի՝ ելույթի ընթացքում հերքողական հայտարարություններից բացի,  Էրդողանն սպառնալիքներ է հնչեցրել նաև իր երկրում բնակվող ՀՀ քաղաքացիների հասցեին:

Ինչպես օրեր առաջ Թուրքիայում արտահանողների մեջլիսի նիստում, այնպես էլ համալսարանի իր ելույթի ընթացքում Էրդողանը բացահայտորեն սպառնացել է հետ ուղարկել ՀՀ քաղաքացիներին:

«Թուրքիայում 100 հազար հայ է բնակվում, որոնց մի մասը մեր քաղաքացիներն են, մյուս մասը` ոչ: Մենք Հայաստանից եկածներին հյուրընկալում ենք այնպես, ինչպես Սիրիայից և Իրաքից եկածներին: Մի՞թե ներելի է այդ մարդկանց (գերմանացիների) արածը Թուրքիայի նման սիրալիր մոտեցում ցուցաբերող երկրի հանդեպ: Մենք կարող էինք այլ կերպ վարվել: Եթե մենք հայերի հանդեպ թշնամաբար տրամադրված երկիր լինեինք, բոլոր Թուրքիա եկածներին հետ կուղարկեինք Հայաստան»,- ասել է Էրդողանը:

Բացի այդ` նա կտրականապես ժխտել է հայկական եկեղեցիները քանդելու կամ բռնագրավելու փաստերը` ասելով, որ «իրենք վերադարձնում են հայկական գույքը»:

Հիշեցնենք, որ էրդողանը ՀՀ քաղաքացիներին սպառնացող հայտարարությամբ էր հանդես եկել նաև 2010 թվականին, երբ Շվեյցարիայի խորհրդարանում Հայոց ցեղասպանության ճանաչման հարցով բանաձևեր էր ընդունել: